Parlament Májilisiniń jalpy otyrysynda «Qazaqstan Respýblikasynyń keibir zańnamalyq aktilerine týristik qyzmet máseleleri boiynsha ózgerister men tolyqtyrýlar engizý týraly» zań jobasy ekinshi oqylymda maquldandy, dep habarlaidy QazAqparat.
Zań jobasy týristik qyzmet salasyndaǵy zańnamany jetildirý maqsatynda ázirlendi.
Atalǵan qujat 2020 jylǵy 18 qarashada Májiliste birinshi oqylymda maquldandy.
Jumys tobynyń zań jobasymen jumysy barysynda depýtattar:
- sheteldik týristi tartqany úshin týroperatorlardyń shyǵyndaryn sýbsidiialaý, týristik qyzmet obektilerin salý, rekonstrýktsiialaý, jol boiyndaǵy servis obektilerin salý kezindegi shyǵyndardyń bir bóligin óteý boiynsha týristik salany memlekettik qoldaý sharalaryn aiqyndaýǵa jáne damytýdy yntalandyrýǵa;
- ishki jáne kelý týrizmi salasyndaǵy týroperatorlyq qyzmet litsenziiasyn habarlama tártibine aýystyrýdy alyp tastaýǵa jáne litsenziialaý qyzmetiniń osy túrin saqtaýǵa;
- basym týristik aýmaqty basqarý úshin basqarýshy kompaniia qurý jónindegi normany alyp tastaýǵa;
- týristik jarnany respýblikalyq biýdjetten respýblikalyq mańyzy bar qalalardyń, astananyń, aýdandardyń jáne oblystyq mańyzy bar qalalardyń biýdjetterine aýystyrýǵa jáne máslihattarǵa týristik jarnanyń mólsherlemelerin bekitý jóninde quzyretti berýge baǵyttalǵan túzetýler engizdi.
Budan basqa, depýtattar Qazaqstan Respýblikasynyń qoldanystaǵy zańnamasyna jáne zań tehnikasynyń talaptaryna sáikes keltirý boiynsha, sondai-aq zań jobasynyń jekelegen normalaryn naqtylaityn jáne mazmunyn jaqsartatyn túzetýler engizdi.
Jumys tobyna Parlament Májilisiniń komitetteri men depýtattarynan 355 túzetý kelip tústi, olar múddeli ministrlikter men vedomstvolar, qoǵamdyq birlestikter men saraptama uiymdary ókilderiniń qatysýymen jumys tobynyń 32 otyrysynda, komitettiń keńeitilgen otyrystarynda qaraldy.
