QR Parlamenti Májilisiniń depýtattary «Qazaqstan Respýblikasynyń keibir zańnamalyq aktilerine tótenshe jaǵdai máseleleri boiynsha ózgerister engizý týraly» zań jobasyn talqylaýda, dep habarlaidy QazAqparat.
Zań jobasy boiynsha baiandama jasaǵan QR Ulttyq ekonomika ministri Rýslan Dálenovtiń aitýynsha, qujat «Áleýmettik-ekonomikalyq turaqtylyqty qamtamasyz etý jónindegi sharalar týraly» 2020 jylǵy 16 naýryzdaǵy Memleket basshysynyń Jarlyǵyn oryndaý maqsatynda ázirlendi. Zań jobasynyń maqsaty áleýmettik-ekonomikalyq turaqtylyqty qamtamasyz etý úshin tótenshe jaǵdai kezeńinde jedel sharalar qabyldaý múmkindigi bolyp sanalady.
«Zań jobasynda tótenshe jaǵdai kezeńinde memlekettik basqarýdyń jumys isteý mehanizmi belgilenedi. Ol úshin «Tótenshe jaǵdai týraly» jáne «Quqyqtyq aktiler týraly» zańdarǵa túzetýler engiziledi. Atap aitqanda, qujat tótenshe jaǵdai kezeńinde zańnamanyń jekelegen salalarynyń qoldanylý erekshelikterimen tolyqtyrylady. Zań jobasynda olarǵa 14 sala jatqyzylady: salyqtyq, biýdjettik, keden, banktik, eńbek, monopoliiaǵa qarsy zańnama; densaýlyq, memlekettik satyp alý, valiýtalyq retteý týraly zańnama; áleýmettik qorǵaý, memlekettik múlik, memlekettik baqylaý jáne qadaǵalaý salasynda; sondai-aq eldiń halyqaralyq mindettemelerin iske asyrý», - dedi ministr.
Onyń atap ótýinshe, tótenshe jaǵdai kezeńinde qabyldanǵan quqyqtyq aktiler jalpy alǵanda ol aiaqtalǵanǵa deiin qoldanylatyn bolady. Olardyń qataryna ózge qoldanylý merzimi belgilengen aktiler kirmeidi.
«Tótenshe jaǵdai týraly» Zańda belgilengen jaǵdaida jáne tártippen normativtik quqyqtyq aktiniń nemese onyń jekelegen normalarynyń qoldanylýyn toqtata turý boiynsha «Quqyqtyq aktiler týraly» Zańǵa usynylyp otyrǵan túzetý engiziledi. Jalpy alǵanda, atalǵan túzetýler tótenshe jaǵdai kezeńinde áleýmettik-ekonomikalyq turaqtylyqty qamtamasyz etýge baǵyttalǵan. Zań jobasyn qabyldaý biýdjetten qosymsha qarjylyq shyǵyndardy talap etpeidi jáne teris áleýmettik-ekonomikalyq jáne quqyqtyq saldarǵa ákep soqpaidy», - dedi Rýslan Dálenov.
