Saiasattanýshy Qazbek Maigeldinov Qazaqstandaǵy Májilis pen Máslihattar depýtattary sailaýynyń qorytyndysy týraly pikirimen bólisti.
Sarapshy Parlamenttiń jańa quramy qol jetkizilgen qoǵamdyq-saiasi kelisimniń nátijesi ekenin atap ótti, dep habarlaidy QazAqparat.
«Sailaý birqalypty, jaqsy ótti. Bastapqyda-aq sailaýdy qaýipsizdik sharalary men sanitarlyq-epidemiologiialyq normany saqtai otyryp ótkizý josparlanǵan. Bul elimizdegi azamattardyń saiasi saýattylyǵy men joǵary uiymshyldyǵyn bildiredi», - deidi Qazbek Maigeldinov.
Onyń aitýynsha, úgit-nasihat jumystary kezinde saiasi partiialar maqsatty aýditoriiaǵa kóńil bólgen.
«7% shekten óte almaǵan partiialar kez kelgen jaǵdaida aimaqtardaǵy pozitsiialaryn nyǵaitady jáne aimaqtyq kún tártibin qurýǵa belsendi qatysady. Bul sailaýdyń basty artyqshylyǵy - aimaqtardaǵy partiialardyń pozitsiialaryn nyǵaitý jáne aimaqtyq saiasi protsesterdi jandandyrý. Biylǵy sailaý naýqanynda biz úkimettik emes sektor men qarapaiym azamattardyń sailaýdy baiqaý úderisine zor qyzyǵýshylyǵyn baiqadyq», - deidi ol.
Sondai-aq, ol QR Parlamenti Májilisiniń depýtattyǵyna kandidattardyń bekitilgen tizimine qatysty oiyn aitty. «Nur Otan» men «Aq jol» partiiasy tizimdi jariialap qoidy.
«Jalpy Parlamenttiń jańa quramy qol jetkizilgen qoǵamdyq-saiasi kelisimniń nátijesi. Olar Prezident reformalarynyń jańa paketin júzege asyrýǵa tikelei qatysady. Bul úlken jaýapkershilikti talap etedi. Saiasi reformalardyń alǵashqy paketi óz jemisin berdi. Munyń taǵy bir dáleli - turaqty sailaý protsesi. Shyn máninde, barlyq tizimder jańa kelbetke ie. Bul Parlament Májilisiniń tolyǵymen jańarǵanynyń basty kórsetkishi. Sonymen qatar, kvotanyń 30%-y esebinen depýtattar quramy jasarady. Májilis mobildi jáne tiimdi bolýy kerek», - deidi saiasattanýshy.
