Parlament Májilisiniń jalpy otyrysynda «Tarihi-mádeni mura obektilerin qorǵaý jáne paidalaný týraly» zań jobasy birinshi oqylymda maquldandy, dep habarlaidy QazAqparat.
«Búginde tarihi-mádeni mura nysandarynyń sany 25 myńnan asady. Sonymen qatar, «Kieli Qazaqstan» baǵdarlamasyna sáikes, alǵash ret tarihi-mádeni mura qoryn aýqymdy júielendirý júrgizilip, nátijesinde jalpyulttyq mańyzy bar 180 nysan men jergilikti mańyzy bar 456 kieli nysan tizimin qalyptastyrdyq. Jalpy, Memleket basshysynyń tapsyrmasyna sáikes, elimizde tarihi-mádeni qordy keń kólemde saqtaý, túletý, damytý jáne ilgeriletýdi qamtamasyz etý talap etiledi», - dedi QR Mádeniet jáne sport ministri Arystanbek Muhamediuly.
Zań jobasynda tarihi-mádeni mura nysandaryn qorǵaý, zerdeleý, saqtaý, paidalaný jáne keńinen tanytý salasyndaǵy qoǵamdyq qatynastardy memlekettik retteý júiesin qurý, sondai-aq tarih pen mádeniet nysandaryn anyqtaý, esepke alý, pasporttaý, júrgizý kózdelgen.
«Osyǵan deiin atap ótkenimdei, tarihi-mádeni mura búkil álemde áleýmettik-ekonomikalyq damýdyń erekshe faktory jáne resýrsy retinde qaralady. Tarihi-mádeni mura obektileri belsendi týristik ainalymdarǵa engizilgen, olardyń kóbi áleýmettik-ekonomikalyq ortada múliktik aktiv retinde paidalanylady jáne osy jaǵdailarǵa bailanysty olardyń saqtalýyn qamtamasyz etý ózekti de alǵyshartty maqsatqa ainalyp otyr. Osy Zań jobasyn ázirleý barysynda Izrail, Italiia, Frantsiia, Resei, Ulybritaniia jáne ózge elderdiń tájiribesi zerdelendi. Zań jobasynyń basty maqsattaryna toqtalsaq, birinshiden, arheologiialyq jáne ǵylymi-restavratsiialaý jumystaryn júrgizý boiynsha qyzmetti litsenziialandyrý máselelerin qataitý bolyp tabylady. Ekinshiden, alǵash ret osy jobamen arheologiia jáne ǵylymi-restavratsiialaý jumystaryn josparlaý tetikterin engizý qarastyryldy. Sonymen qatar, tarihi-mádeni mura obektileri boiynsha tarihi-mádeni saraptama júrgizý institýtyn endirý usynylyp otyr», - dedi ministr.
Atap aitqanda, tarihi-mádeni mura nysandaryn tarih jáne mádeniet eskertkishteri dep taný tártibi aiqyndaldy. Ýákiletti organ men jergilikti atqarýshy organdardyń olardy qorǵaý men paidalaný salasyndaǵy quzyreti bekitilgen, sonymen qatar «Kieli obektiler» degen uǵym engizilip otyr.
Munymen qosa, tarih jáne mádeniet eskertkishterine arheologiialyq jáne ǵylymi-restavratsiialyq jumystardy jyl saiynǵy josparlaý júiesin engizý maqsatynda zań jobasynda tiisti josparlaý men ony esepke alý tetigin aiqyndaý kózdeledi. Arheologiialyq, sáýlet, qala qurylysy jáne ózge de eskertkishterdiń saqtalýyn qamtamasyz etýge baǵyttalǵan sharalardy iske asyrý tártibi qarastyrylǵan.
Aita keteiik, jalpy otyrys barysynda «Qazaqstan Respýblikasynyń keibir zańnamalyq aktilerine tarihi-mádeni mura máseleleri boiynsha ózgerister men tolyqtyrýlar engizý týraly» zań jobasy qaraldy. Atalǵan ilespe zań jobasyn palata depýtattary birinshi oqylymda maquldady.
