QR Parlamenti Májilisiniń mandattary úshin sailaýǵa 6 saiasi partiia túsedi. Bul týraly búgin QR Ortalyq sailaý komissiiasynyń múshesi Asylbek Smaǵulov aitty, dep habarlaidy "Ult aqparat".
«QR «Sailaý týraly» konstitýtsiialyq zańynyń 12-baby 2-1-tarmaqshasyna sáikes, Ortalyq sailaý komissiiasy saiasi partiialardy partiialyq tizimder boiynsha sailanatyn Parlament Májilisi depýtattaryn jáne máslihattar depýtattaryn sailaýǵa qatysýǵa jiberý týraly máseleni qaraidy. QR «Sailaý týraly» konstitýtsiialyq zańynyń 87-baby 1-tarmaǵyna jáne 103-babynyń 1-tarmaǵyna sáikes partiialyq tizimder boiynsha sailanatyn Májilis depýtattyǵyna jáne máslihattar depýtattyǵyna kandidattar usyný quqyǵy belgilengen tártippen tirkelgen saiasi partiialarǵa tiesili», - dedi ol Ortalyq sailaý komissiiasy otyrysynda.
Onyń aitýynsha, Ádilet ministrligi usynǵan aqparatqa sáikes, QR-da 6 saiasi partiia tirkelip, jumys isteýde. Búgingi kúni barlyq saiasi partiialar zańnama aiasynda jumys isteidi.
«Olardy qaita qurýǵa nemese taratýǵa ýákiletti organdar tarapynan quqyqtyq negizder joq. Demek, Parlament Májilisi depýtattarynyń sailaýyna osy tirkelgen saiasi partiianyń barlyǵy jiberiledi. Olardy sailaýǵa jiberýden bas tartýǵa quqyqtyq negizder joq», - dedi Asylbek Smaǵulov.
Sonymen, partiialyq tizimder boiynsha sailanatyn QR Parlamenti Májilisiniń depýtattaryn sailaýǵa qatysýǵa jiberý týraly qaýlyǵa sáikes:
- «Aq jol» Qazaqstannyń demokratiialyq partiiasy» qoǵamdyq birlestigi;
- «Aýyl» halyqtyq-demokratiialyq patriottyq partiiasy» qoǵamdyq birlestigi;
- «Birlik» saiasi partiiasy« qoǵamdyq birlestigi;
- «Jalpyulttyq sotsial-demokratiialyq partiiasy» respýblikalyq qoǵamdyq birlestigi;
- «Qazaqstannyń kommýnistik halyq partiiasy» qoǵamdyq birlestigi;
- «Nur Otan» partiiasy» qoǵamdyq birlestigi sailaýǵa qatysady.
