Parlament Májilisiniń jalpy otyrysynda «Qazaqstan Respýblikasynyń Parlamenti jáne onyń depýtattarynyń mártebesi týraly» Qazaqstan Respýblikasynyń Konstitýtsiialyq zańyna tolyqtyrýlar engizý týraly» Konstitýtsiialyq zańynyń jobasy maquldandy, dep habarlaidy QazAqparat.
«Atalǵan zań jobasy Prezident Qasym-Jomart Toqaevtyń Ulttyq qoǵamdyq keńestiń otyrysynda «parlamenttik oppozitsiia» institýtyn zańnamalyq bekitý týraly tapsyrmasyn oryndaý maqsatynda daiyndaldy. Memleket basshysynyń atalǵan tapsyrmasyn paidalanyp, «Aq jol» partiiasy aldyn ala daiyndaǵan parlamenttik oppozitsiia týraly zań jobasyn qazirgi jaǵdaidyń talaptaryna sáikes qaita jańartty. Zań jobasy fraktsiia depýtattarynyń saparlary barysynda jergilikti jáne ulttyq deńgeiinde sailaýshylardyń, ǵalymdardyń ári saiasi qoǵam ókilderiniń talqylaýynan ótti. Talqylaý jumystary buqaralyq aqparat quraldarynda jariialandy», - dedi Májilisiniń depýtaty Azat Perýashev.
Zań jobasynyń negizgi maqsaty - qoldanystaǵy zańnamada «parlamenttik kópshilik» jáne «parlamenttik oppozitsiia» uǵymdaryn bekitý boiynsha quqyqtyq negizderdi qamtamasyz etý.
Máselen, parlamenttik oppozitsiiaǵa qandai da bir másele boiynsha óz ustanymyn bildirýge kepildik berý maqsatynda zań jobasynda saiasi partiialar fraktsiialary basshylarynyń Parlament Palatalarynyń birlesken otyrystarynda, Parlament Májilisiniń jalpy otyrystarynda, turaqty komitetterdiń, jumys toptarynyń otyrystarynda, parlamenttik tyńdaýlar men ózge de is-sharalarda sóz sóileýge kepildik berilgen quqyǵyn bekitý kózdeledi.
Zań jobasymen parlamenttik oppozitsiiaǵa Parlament Májilisiniń Reglamentinde kózdelgen tártippen kúntizbelik jylda keminde bir parlamenttik tyńdaý ótkizýge bastamashylyq jasaý, sondai-aq parlamenttik sessiiada keminde eki ret «úkimet saǵattarynyń» kún tártibin aiqyndaý quqyǵy beriledi.
«Kez kelgen parlamenttik is-sharalarda parlamenttik kópshiliktiń orny, róli sheshý ekenin jaqsy bilemiz. Al osy zań jobasynyń maqsaty – parlamenttik oppozitsiianyń quqyqtaryn iske asyrý. Qoǵamdy alańdatatyn problemalardy kóshede emes, Parlament qabyrǵasynda kótergen durys dep sanaimyz. Sol úshin oppozitsiiaǵa keminde sessiia saiyn ózekti taqyryptardy parlamenttik tyńdaý deńgeiinde kóterýge múmkindik berý kerek», - Perýashev.
Óz kezeginde Májilis Tóraǵasy Nurlan Nyǵmatýlin atalǵan máselege qatysty pikir bildirdi.
«Menińshe, bul normanyń basqa normalarmen salystyrǵanda úlken aiyrmashylyǵy bar. Endi zań deńgeiinde parlamenttik oppozitsiia keminde bir ret osy bizdiń parlamenttik tyńdaýǵa bastamashy bolýyna múmkindik beredi. Ol buryn bolmaǵan, sondyqtan bul qadam mańyzdy», - dedi N. Nyǵmatýlin.
