Parlament Májilisiniń jalpy otyrysynda «Qazaqstan Respýblikasynyń keibir zańnamalyq aktilerine memlekettik satyp alý máseleleri boiynsha ózgerister men tolyqtyrýlar engizý týraly» zań jobasy ekinshi oqylymda maquldandy, dep habarlaidy "Ult aqparat".
Atalǵan zań jobasy 2020 jylǵy 23 jeltoqsanda birinshi oqylymda maquldandy.
Jumys tobynyń zań jobasymen jumys isteýi barysynda depýtattar:
- ónim berýshini tańdaý protsesin edáýir jeńildetýge jáne jyldamdatýǵa, sondai-aq ashyq básekeli naryq qurý esebinen biýdjet qarajatynyń únemdelýin arttyrýǵa múmkindik beretin «elektrondyq dúken» uǵymyn naqtylaýǵa;
- áleýetti ónim berýshilerge konkýrsqa qatysýǵa ótinimdi qamtamasyz etý úshin ǵana emes, memlekettik satyp alý týraly sharttyń oryndalýyn qamtamasyz etý úshin de jeke shotqa aqsha salýǵa múmkindik beretin «elektrondyq ámiian» uǵymyn naqtylaýǵa;
- satyp alynatyn taýarlardy avtomattandyryp sáikestendirý maqsatynda taýarlardyń birizdendirilgen sipattamasyn qalyptastyrýǵa arnalǵan «elektrondyq taýarlar katalogy» degen jańa uǵymdy engizýge;
- «offteik-kelisimsharttar» túrindegi memlekettik satyp alý týraly uzaq merzimdi kepildendirilgen sharttar jasasýǵa;
- áleýetti ónim berýshiler týraly barlyq málimet qamtylatyn memlekettik satyp alý veb-portalynda áleýetti ónim berýshiler pasporttarynyń bazasyn qurýǵa;
- áleýetti ónim berýshilerge materialdyq jáne eńbek resýrstaryna ǵana emes, memlekettik satyp alý týraly shart boiynsha mindettemelerdi oryndaý úshin jetkilikti qarjy resýrstaryna da ie bolý bóliginde qoiylatyn biliktilik talaptaryn naqtylaýǵa baǵyttalǵan túzetýler, sondai-aq jekelegen normalardy naqtylaityn jáne zań jobasynyń mazmunyn jaqsartatyn túzetýler engizdi.
Májilistiń Ekonomikalyq reforma jáne óńirlik damý komitetiniń málimetinshe, palatanyń barlyq komiteti zań jobasy boiynsha oń qorytyndylar berdi. Jumys tobyna 257 túzetý kelip tústi, olar múddeli ministrlikter, vedomstvolar, qoǵamdyq birlestikter men saraptamalyq uiymdar ókilderiniń qatysýymen jumys tobynyń jiyrma tórt otyrysynda, Komitettiń keńeitilgen otyrystarynda qaraldy.
