Parlament Májilisiniń jalpy otyrysynda «Birikken Ulttar Uiymynyń mediatsiia nátijesinde qol jetkizilgen halyqaralyq tatýlasý kelisimderi týraly konventsiiasyn ratifikatsiialaý týraly» zań jobasy maquldandy, dep habarlaidy QazAqparat.
«Búgingi tańda mediatsiiaǵa degen suranys neǵurlym artýda. Mediatsiianyń kómegimen eki taraptyń múddelerin qanaǵattandyra otyryp, daýdy sheshýge bolatyndyǵy azamattardy qyzyqtyrady. 2019 jylǵy 7 tamyzda Singapýrda Qazaqstan BUU-nyń mediatsiia nátijesinde qol jetkizilgen halyqaralyq tatýlasý kelisimderi týraly konventsiiasyna qol qoidy. Konventsiianyń maqsaty – mediatsiia nátijesinde qol jetkizilgen halyqaralyq kelisimderdi qatysýshy memleketterdiń aýmaǵynda taný jáne oryndaý. Osy ýaqytqa deiin mediatsiia nátijesinde qol jetkizilgen halyqaralyq kelisimderdi taný jáne saqtalýyn qamtamasyz etý úshin biryńǵai tetigi bolǵan joq. Sáikesinshe, daý taraptary úshin tatýlasý kelisimin basqa iýrisdiktsiiada taný jáne oryndaý úshin sotqa júginýge múmkindik týyndaidy», - dedi QR Ádilet ministri Qanat Mýsin.
Onyń aitýynsha, Konventsiiaǵa sáikes tatýlasý kelisimin oryndaý ulttyq zańnamaǵa sáikes júzege asyrylady. Mediatsiia nátijesinde qol jetkizilgen kelisimderdi oryndaý tártibi «Mediatsiia týraly» QR Zańynyń jáne QR Azamattyq protsestik kodeksiniń erejelerinde kózdelgen.
«Konventsiia qatysýshy memleketterdiń eki jáne odan da kóp kompaniialary arasyndaǵy halyqaralyq kommertsiialyq daýlaryna ǵana qoldanylady. Konventsiiany ratifikatsiialaý sottan tys mediatsiiany jetildirýde oń qadam bolyp otyr. Ol halyqaralyq saýdaǵa járdemdesýdiń mańyzdy quraly bolyp sanalady jáne kommertsiialyq taraptardyń halyqaralyq kelisimderin júzege asyrýǵa yqpal etedi. Qazaqstannyń Konventsiianyń qatysýshy retindegi mártebesi eldiń halyqaralyq biznes-bedeline jáne investitsiialyq tartymdylyǵyna oń áser etedi», - dedi ministr.
