Parlament Májilisi «Qazaqstan Respýblikasy men Resei Federatsiiasy arasyndaǵy áskeri yntymaqtastyq týraly shartty ratifikatsiialaý týraly» zań jobasy boiynsha talqylaýdy bastaidy, dep habarlaidy "Ult aqparat".
Atalǵan shart 2020 jyly 16 qazanda Nur-Sultan qalasynda jasaldy.
«Shartta memleketterdiń qaýipsizdigin qamtamasyz etý múddesinde áskerlerdi qoldanýdy birlesip josparlaýda jáne óńirlik qaýipsizdikke tónetin syn-qaterler men qaýipterge qarsy is-qimyl jasaýda áskeri yntymaqtastyqty júzege asyrý, sondai-aq taraptardyń áskeri yntymaqtastyǵynyń basqa da baǵyttary boiynsha ózara is-qimyl jasaý kózdelip otyr. Komitet osy zań jobasy boiynsha 2021 jylǵy 15 jeltoqsanǵa deiingi merzimde qorytyndy ázirleýge daiyn», - dedi Májilistiń Halyqaralyq ister, qorǵanys jáne qaýipsizdik komitetiniń tóraiymy, depýtat Aigúl Quspan palatanyń jalpy otyrysynda.
Sonymen qatar palata depýtattary «Táýelsiz Memleketter Dostastyǵyna qatysýshy memleketter qarýly kúshteriniń birlesken bailanys júiesi týraly kelisimdi ratifikatsiialaý týraly» zań jobasyn qaraityn bolady. Bul kelisim 2020 jyly 29 mamyrda jasaldy.
«Kelisimge sáikes taraptar qujatqa qatysýshy memleketterdiń qarýly kúshteri arasyndaǵy ózara is-qimyldy damytý maqsatynda TMD-ǵa qatysýshy memleketter qarýly kúshteriniń birlesken bailanys júiesin qurady. Komitet osy zań jobasy boiynsha 2021 jylǵy 15 jeltoqsanǵa deiingi merzimde qorytyndy ázirleýge daiyn», - dedi Aigúl Quspan.
