Parlament Májilisiniń jalpy otyrysynda «Qazaqstan Respýblikasynyń keibir zańnamalyq aktilerine inkliýzivti bilim berý máseleleri boiynsha ózgerister men tolyqtyrýlar engizý týraly» zań jobasy maquldandy, dep habarlaidy QazAqparat.
Zań jobasyna Qazaqstan Respýblikasy Parlamenti Májilisi men Senaty depýtatattary, «Nur Otan» partiiasynyń músheleri bastamashylyq etti.
«Atalǵan zań jobasy múgedek adamdardyń kemsitýsiz bilim alý quqyqtaryn qamtamasyz etý úshin Memleket basshysynyń 2019 jylǵy Qazaqstan halqyna Joldaýyn iske asyrý maqsatynda ázirlendi. Sondai-aq qoldanystaǵy zańnamany 2015 jyly Qazaqstanda ratifikatsiialanǵan Múgedekterdiń quqyqtary týraly Konventsiiaǵa sáikes keltirýge baǵyttalǵan. Inkliýzivti bilim berýge ótý adam quqyqtary týraly halyqaralyq hattamalarǵa jáne barlyq balalardyń sapaly bilim alýy men oǵan teń qoljetimdi quqyǵynyń bolýy jáne jalpyǵa birdei tanýmen negizdelgen», - dedi Májilis depýtaty Janat Omarbekova
Onyń aitýynsha, elimizde erekshe bilim berýdi qajet etetin 162 myńnan astam bala nemese balalardyń jalpy sanynyń 2,7 paiyzy bilim berý protsesine erekshe kózqarasty talap etedi. Osyǵan bailanysty 2011 jyldan bastap Qazaqstanda inkliýzivti bilim berýdi kezeń-kezeńmen damytý bastaldy. Qazaqstan Respýblikasynda bilim berýdi damytýdyń 2011 - 2025 jyldarǵa arnalǵan memlekettik baǵdarlamasynda inkliýzivti orta qurý boiynsha sharalar kózdelgen.
«Sonymen birge, zańnamalyq deńgeide retteýdi talap etetin máseleler de bar, olar bastamashylyq etken zań jobasynda kórinis tapty. Zań jobasynda «Bilim týraly», «Kemtar balalardy áleýmettik jáne meditsinalyq-pedagogikalyq túzeý arqyly qoldaý týraly», «Qazaqstan Respýblikasyndaǵy balanyń quqyqtary týraly», «Qazaqstan Respýblikasynda múgedekterdi áleýmettik qorǵaý týraly» zańdarǵa ózgerister men tolyqtyrýlar engizý kózdeledi. Birinshiden, bilim berýdiń barlyq deńgeilerinde oqytý úshin arnaiy jaǵdailar jasaý esebinen erekshe bilim berýdi qajet etetin balalar úshin memlekettik kepildikter kózdelgen», - dedi J. Omarbekova.
Ekinshiden, oqý protsesinde erekshe bilim berýdi qajet etetin balalardy psihologiialyq-pedagogikalyq qoldap otyrýdyń arnaiy sharttary reglamenttelgen. Úshinshiden, bilim berý qajettilikterin baǵalaý engizilýde. Ol úshin baǵalaý ólshemderin, qajettilikterdi aiqyndaý ádistemesin, sondai-aq «erekshe» balalarmen jumys jasaý boiynsha pedagogterge ádistemelik usynymdardy aiqyndaityn tiisti qaǵidalar ázirlenetin bolady.
«Tórtinshiden, oqý josparlarynyń, baǵdarlamalar ózgermeligin, ikemdiligin qamtamasyz etetin normalar, sondai-aq bilim alýshynyń damý erekshelikterine bailanysty jetistikterin baǵalaý júiesi engizilgen. Bul inkliýzivti bilim berý protsesiniń jetekshi qaǵidattarynyń biri bolyp tabylady. Besinshiden, bilim berý uiymdarynda arnaiy jaǵdailardy qamtamasyz etýde, onyń ishinde erekshe bilim berýdi qajet etetin balalardy arnaiy psihologiialyq-pedagogikalyq qoldap otyrýǵa memlekettik bilim berý tapsyrysyn ornalastyrý esebinen ákimdikterdiń quzyreti keńeitildi. Jan basyna shaqqandaǵy qarjylandyrýdy engizý bilim berý uiymy qyzmetiniń túri men nysanyna qaramastan qarjylandyrýdyń biryńǵai tásilin qamtamasyz etedi. Memlekettik tapsyrysty iske asyrý jeke sektordy tartý, balalardy qamtý kórsetkishterin jaqsartý, sondai-aq biýdjetke júktemeni azaitýǵa múmkindik beredi», - dedi depýtat.
