QR Pralamenti Májilisiniń jalpy otyrysynda «Qazaqstan Respýblikasynyń keibir zańnamalyq aktilerine básekelestikti damytý máseleleri boiynsha ózgerister men tolyqtyrýlar engizý týraly» zań jobasy birinshi oqylymda maquldandy, dep habarlaidy QazAqparat tilshisi.
Depýtattar qujat jobasyn biraýyzdan maquldap daýys berdi. Májilis tóraǵasy Nurlan Nyǵmatýlin atalǵan zań jobasyndaǵy elektr energiiasyn ortalyqtandyrylǵan saýda-sattyq arqyly satý halyqtyń qaltasyna qalai áser etetinin surady.
Serik Jumanǵarinniń aitýynsha, bul shara kerisinshe, elektr baǵasyn memleket tarapynan retteýge múmkindik bermek.
«Serik Maqashuly, bul jerde osy normanyń jumys isteitinin qarapaiym halyq aradaǵy deldaldardy alyp tastaǵan sátten bastap kórýi qajet. Bul jerde shema qarapaiym bolý kerektigi túsinikti. Ónim baǵasy túsýi qajet. Ortalyqtandyrylǵan birjalyq saýda-sattyq arqyly baǵa qymbattap ketip júrmesin. Halyq onda deldaldardy nege alyp tastadyńyzdar dep suraidy. «Elektrondy saýdany zańdastyryp edińder, baǵa sharyqtap ketti» dep júrmesin. Túsinemin, bul – óte názik másele. Biraq osy jerde agenttik naqty retteý kerek», - dedi Nurlan Nyǵmatýlin.
