Korrýptsiiaǵa qarsy is-qimyl ulttyq biýrosy "Báiterek" ulttyq basqarý holdinginiń enshiles "Báiterek DEVELOPMENT" kompaniiasynyń top-menedjerleriniń ustalǵanyn habarlady. Ulttyq biýro 17 qarasha kúni keshke kompnaiianyń basqarma tóraǵasynyń orynbasary Aslan Jaqypov, atqarýshy direktory Ǵaziza Sarieva, memlekettik-jekemenshik seriktestik direktsiiasy departamentiniń jetekshisi Baýyrjan Aitymbetov jáne jáne burynǵy atqarýshy direktor Anarbaidyń ustalǵanyn aitady. Olar "Nurly jol" baǵdarlamasy boiynsha jalǵa beriletin turǵyn úiler qurylysy qyzmetin satyp alýda qurylys kompaniiasynyń múddesin qorǵaǵany úshin para alǵan degen kúdikke ilinip otyr.
Ustalǵan Asylan Jaqypov - Batys Qazaqstan oblysynyń burynǵy ákimi jáne burynǵy májilis spikeri Qabibolla Jaqypovtyń uly. Qabibolla Jaqypov májilis spikeri qyzmetin 2014 jyldyń sáýirinen 2016 jyldyń naýryzyna deiin atqarǵan.
Korrýptsiiaǵa qarsy ulttyq biýronyń saityndaǵy ustalý týraly habarlamaǵa qosa dybysy joq qysqa eki video rolik berilgen. Birinshi videoda er adamdar shoiyn vannanyń astynan paketke salynǵan teńgedei jáne dollar banknottardy alyp shyǵady. Ekinshi videoda aqshalardy ústelge qoiady.
Ulttyq biýronyń uiǵarymynsha, Baýyrjan Aitymbetov qurylys kompaniiasynyń ókilinen aqshany alyp, odan ary Asylan Jaqypov pen Ǵaziza Sarievaǵa beredi. Sońǵy ekeýi kelisim sharttar men oryndalǵan jumystar týraly aktige jáne tólem jasaýǵa qol qoiady. 13 zańdy tulǵa qatysqan qiturqylyq áreketter Oral, Kókshetaý, Atyraý, Aqtóbe, Taraz, Taldyqorǵan qalalaryndaǵy qurylystarda bolǵan. Biýro aqparatyna qaraǵanda, Jaqypov pen Sariev jáne Aitymbetov 17 qarashada "28 million teńge kólemindegi kezekti parany alǵany úshin" ustalǵan. Tergeýshiler bul qarjy jeke qurylys kompaniiasyna Pavlodarda turǵyn úi salý kelisimin jasaǵan kezde qamqorlyq tanytqany úshin berilgen deidi.
Korrýptsiiaǵa qarsy qyzmet sonymen qatar birneshe ret para berdi degen kúdikpen taǵy tórt adam - jekemenshik qurylys kompaniialarynyń tórt jetekshileri men quryltaishylarynyń ustalǵanyn aitady.
