QR parlamenti májilisiniń depýtattary Eýraziia ekonomikalyq odaǵy keden kodeksiniń shartyn ratifikatsiialaýdy maquldady, dep habarlaidy "Ult aqparat".
Májilistiń ekonomikalyq reforma jáne óńirlik damý komitetiniń qorytyndysyna sáikes, shartqa osy jyldyń 11 sáýirinde Máskeýde Joǵary Eýraziialyq ekonomikalyq keńes otyrysynda qol qoiyldy. Ratifikatsiianyń negizgi maqsaty – Eýraziialyq ekonomikalyq odaqta biryńǵai kedendik retteýdi qamtamasyz etý.
Ulttyq ekonomika ministri Timýr Súleimenovtiń aitýynsha, EAEO Keden kodeksine engizilgen negizgi qosymshalardyń qataryna kedendegi biznes-protsesterdi avtomattandyrý jatady.
"Elektrondy deklaratsiialaý basymdyǵy engiziledi. Iaǵni, deklaratsiialaý elektrondy túrde júzege asady degen sóz. Qandai da bir rastaýshy qujatty qosýdyń qajeti joq. Qajetti málimetterdiń bári deklaratsiianyń ózinde kórsetiledi. Tek jekelegen jaǵdailarda ǵana, máselen tehnikalyq aqaý bolǵan kezde, deklaratsiia qaǵaz júzinde júrgiziledi", — dedi májiliste zań jobasyn tanystyrǵan Súleimenov.
Buǵan qosa, "biryńǵai tereze" tetigin paidalaný múmkindigi zańdy túrde bekitildi. Endi keden organdary deklaranttan qujat suratpaidy, olar ony memlekettik organdardyń aqparattyq júiesinen ózderi ala alady.
"Osy eki tarmaq taýarlardy avtomatty túrde shyǵarýdy iske asyrýǵa múmkindik beredi. Iaǵni, keden organdarynyń aqparattyq júiesi, eger qandai da bir zańbuzýshylyq anyqtalmasa, laýazymdy tulǵalardyń qatysýynsyz deklaratsiia shyǵarady. Atalǵan normalar deklaratsiialaý protsesin jeńildetip, jemqorlyq táýekelin azaitady", — dedi ministr.
Sondai-aq, syrtqy ekonomika qyzmetiniń qatysýshylaryna óz shyǵyndaryn ońailatý, máselen, kedendik baj ben salyq boiynsha tólem merzimin uzartý múmkindikteri paida boldy. Eger qandai da bir sebeppen deklarant kedendik baj boiynsha biýdjetpen esep aiyrysa almasa, onda memleket oǵan paiyzdy qosa tóleýmen bir aiǵa tólem merzimin uzartý múmkindigin usynady.
Jekelegen jaǵdailarda paiyz tóleminsiz alty aiǵa deiin bólip tóleý múmkindigi beriledi. Bul, máselen, halyqaralyq sharttar aiasynda taýar jetkizýdi júzege asyrǵanda, aýyl sharýashylyǵy tehnikalaryn, egis materialdaryn, asyl tuqymdy maldardy ákelgende, tabiǵi nemese tehnologiialyq apat saldarynan tóleýshige shyǵyn kelgende júzege asady.
