Parlament Májilisiniń jalpy otyrysynda «2014 jylǵy 29 mamyrdaǵy Eýraziialyq ekonomikalyq odaq týraly shartqa Armeniia Respýblikasynyń qosylýyna bailanysty ózgerister engizý týraly hattamany ratifikatsiialaý týraly» zań jobasy maquldandy, dep habarlaidy QazAqparat.
Eýraziialyq ekonomikalyq odaq týraly negizgi shartqa 2014 jylǵy 29 mamyrda Belarýs, Qazaqstan jáne Resei arasynda qol qoiyldy. Armeniia 2014 jylǵy 10 qazanda qol qoiylǵan Armeniia Respýblikasynyń qosylýy týraly shart aiasynda Eýraziialyq ekonomikalyq odaq týraly shartqa qosyldy, ony barlyq múshe memleketter ratifikatsiialady jáne 2015 jylǵy 2 qańtarda Armeniia onyń tolyq quqyly múshesi boldy.
«Bul rette Shartqa №21 qosymshanyń baǵa belgileý jáne tariftik saiasat negizderin qosa alǵanda, elektr energetikasy salasyndaǵy tabiǵi monopoliialar sýbektileriniń qyzmetterine qol jetkizýdi qamtamasyz etý týraly hattamaǵa qosymsha bolyp sanalatyn múshe memleketter arasynda elektr energiiasyn (qýatyn) memleketaralyq berýdi júzege asyrý ádistemesi búgingi kúni EAEO-ǵa múshe memleketterdiń aýmaǵy boiynsha elektr energiiasyn memleketaralyq berýdi júzege asyrý kezinde Armeniiaǵa óz qoldanysyn taratpaidy. Osyǵan bailanysty, 2017 jylǵy 3 naýryzda Eýraziialyq ekonomikalyq odaq Keńesiniń ókimimen Armeniia Respýblikasynyń qosylýyna bailanysty EAEO shartyna ózgerister engizý týraly hattamanyń jobasy maquldandy. Hattamanyń maqsaty - Armeniianyń Shartqa qosylýyna bailanysty múshe memleketter arasynda elektr energiiasyn memleketaralyq berýdi júzege asyrý ádisnamasyn aiqyndaý bolyp otyr», - dedi QR Energetika ministri Nurlan Noǵaev.
Onyń aitýynsha, Hattamany ratifikatsiialaý Eýraziialyq ekonomikalyq odaqqa múshe memlekettermen, onyń ishinde Armeniia Respýblikasymen uzaq merzimdi keleshekte elektr energetikasy salasyndaǵy tiimdi yntymaqtastyqty qamtamasyz etýge múmkindik beredi.
«Halyqaralyq sharttyń retteý máni baǵa belgileý men tariftik saiasat negizderin qosa alǵanda, elektr energetikasy salasyndaǵy tabiǵi monopoliialar sýbektileriniń qyzmetterine qol jetkizýdi qamtamasyz etý týraly hattamaǵa Armeniia Respýblikasynyń qosylýyn eskere otyryp, Odaqqa múshe memleketter arasynda elektr energiiasyn memleketaralyq berýdi júzege asyrý bolyp sanalady. Búgingi kúni hattamany Qazaqstannan basqa barlyq múshe memleketter ratifikatsiialady. Zań jobasyn qabyldaý teris áleýmettik-ekonomikalyq jáne ózge de saldarǵa ákep soqtyrmaidy, memlekettik biýdjetten qosymsha shyǵystardy talap etpeidi», - dedi ministr.
