Májilis depýtaty Serik Erýbaev «Aq jol» partiiasy parlamenttik fraktsiiasynyń depýtattyq saýalyn Úkimet basshysynyń orynbasary Roman Skliarǵa joldap, dizel men gaz jáne kómir baǵalarynyń máselesin kóterdi, dep habarlaidy QazAqparat.
«Partiiamyzǵa elimizdiń túkpir-túkpirinen kelip jetken avtogaz otynyń tapshylyǵy jáne onyń baǵasynyń kúrt ósýi jónindegi shaǵymdary osy depýtattyq saýalǵa negiz boldy. Buǵan deiin 50-60 teńge turatyn gaz, sońǵy kezde 120-150 teńgege deiin ulǵaidy. Tipti, qoinaýy munai men gazǵa toly Atyraýdyń ózinde, gazdyń baǵasy bir túnde 95 teńgeden 110 teńgege deiin ósti. Bunyń bári gaz qojaiyndarynyń qoldan istep otyrǵan isi degen sóz el aýzynda. Biylǵy qazan aiynda dizel otynyń tapshylyǵyna jáne baǵasynyń ósýine kýá boldyq. Osy jaǵdaiǵa bailanysty, júrgizýshiler óńirlerde ereýilge de shyǵyp jatty», - dedi Serik Erýbaev Májilistiń jalpy otyrysynda.
Sonymen qatar ol qazan aiynyń sońynda aviakerosin tapshylyǵy bolǵanyn eske saldy. Kórshiles eldiń energetika ministrliginiń kómegimen dizel otyny men kerosinniń máselesi ýaqytsha jabylǵan.
«Biraq, dál osy jerde «ýaqytsha» degen sózdi esten shyǵarmaýymyz kerek! Jýyrda, Memleket basshysy, munai ónimderimen qamtamasyz etý máselesi boiynsha Úkimettiń jumysyn qatań synǵa alyp, dizel otynynyń tapshylyǵy jasandy ekendigin basa aitty. 2017 jyly Elbasy qoldanystaǵy úsh munai óńdeý zaýytyn jańǵyrtýmen qatar, tórtinshi zaýyt salý qajettigin atap ótken bolatyn. Alaida, bul bastamaǵa ministrlik tarapynan jańa zaýyt qajet emes degen tujyrym, búgingi jaǵdaida el ekonomikasynyń tiimdiligine kúmándi bolyp otyr. Elimizdegi Atyraý, Pavlodar, Shymkent munai óńdeý zaýyttaryn jańǵyrtýǵa eki trillion teńge jumsaldy. Endeshe, atalǵan zaýyttardyń jyl saiyn jóndeýge toqtatylýyn nemen túsindiredi?
Biraq, ministrliktiń jaýaby árqashan daiyn, eger, dizel otyny tapshy bolsa oǵan kórshiles elderdiń aýyr júk kólikteri kináli, al avtogaz jetpese, oǵan gazben júretin kólikter sanynyń kóbeiýi týraly syltaý aitylady», - dedi depýtat.
Sonymen qatar ol kómirdiń de tapshylyǵyna qatysty syn aitty.
«Mysaly, «Shubarkól» kenindegi kómirdiń tonnasy 5800 teńge bolsa, karerden satyp alýshyǵa barar jolda kómirdiń baǵasy 16 myńǵa deiin jetedi. Bundai jaǵdaida da defitsit jasandy bolyp, baǵalyq sóz bailasý faktileri rastalsa, quqyq qorǵaý organdary da syrtta qalmaýy kerek. Janar-jaǵarmaidyń qymbattaýy transporttyq kompaniialarǵa qosa, kúndelikti taýarlardyń da baǵasynyń ósýine ákelip soqtyrady. Memleket óz tarapynan daǵdarys kezinde adal kásipkerlerden baǵany kótermeýdi árdaiym talap etýdi erejege ainaldyryp alǵandai. Qalyptasyp otyrǵan jaǵdaida, kásipkerlerdiń de memleketten munai ónimderi men kómirdiń baǵasyn retteýdi talap etý oryny bar dep esepteimiz. Joǵaryda aitylǵandy qoryta kele, «Aq jol» fraktsiiasynyń usynystaryn júzege asyrý múmkindigin qaraýdy suraimyz», - dedi Serik Erýbaev.
