Foto: Shutterstock.com
Májilis depýtaty Ádil Jubanov úkimetke jańa zeinetaqy reformasyn júrgizip, eń tómengi zeinetaqyny eń tómengi jalaqymen teńestirýdi usyndy, dep habarlaidy Sputnik Qazaqstan.
Depýtattyń aitýynsha, otyz jyl ishinde áleýmettik sala boiynsha sheshimin tappaǵan eń basty másele – halyqtyń áleýmettik jaǵdaiynyń tómendigi.
"Elimiz bai bolsa da, áleýmettik qoldaýdy qajet etetin az qamtylǵan halyq sany jyl saiyn artyp otyr.Shyn máninde, 30 jylda eń tómengi jalaqy men zeinetaqyny mise tutyp kelemiz. Bul halyqtyń qaryzǵa kirip, nesieniń quryǵyna túsýge itermeleidi. Memleket belgilegen eń tómengi zeinetaqy mólsheri – 57 853 teńgege ómir súrý múmkin emes", - deidi Jubanov vitse-premer Tamara Dúisenovaǵa joldaǵan depýtattyq saýalynda.
Onyń pikirinshe, Qazaqstanǵa zeinetaqy júiesin qaita jańǵyrtý kerek. Bul rette eń az zeinetaqy alatyn zeinetkerlerdiń zeinetaqysyn kóbeitýdiń mańyzy zor.
"Zeinetaqynyń eń tómengi bazalyq mólsherlemesin eń tómengi jalaqy mólsherimen teńestirý qajet. Zeinetaqy júiesindegi tiimdi ózgerister – zeinetkerlerdiń áleýmettik jaǵdaiynyń, ómir súrý sapasynyń az da bolsa artýynyń birden-bir kórsetkishi. Bizdiń elde zeinetkerdiń eń tómengi zeinetaqysy dári-dármek pen durys demalýdy aitpaǵanda, tamaǵyna áreń jetedi", - deidi májilismen.
Jubanov prezidenttiń tapsyrmasymen kelesi jyly eń tómengi jalaqy 70 myńnan 85 myń teńgege deiin kóteriletinin eske saldy.
"Al, osy eń tómengi jalaqy mólsheri eń tómengi kúnkóris deńgeiin eskere otyryp bekitiledi. Sondyqtan da zeinetaqynyń eń tómengi mólsherlemesin eń tómengi jalaqymen teńestirý – úkimet aldyndaǵy kezek kúttirmeitin ózekti máselelerdiń biri bolýy qajet dep esepteimin. Sebebi, memleket azamattardyń eń tómengi jalaqy deńgeiinen tómen emes zeinetaqy alýyna kepildik berýi qajet", - dep sanaidy depýtat.
Aitýynsha, keibir elderde adamnyń zeinetaqysy belgilengen eń tómengi mólsherden tómen bolsa, onda mundai zeinetkerge áleýmettik ústemeaqy tóleý tájiribesi bar.
Jubanov eń tómengi zeinetaqyny eńbek ótilimi joq, zeinetaqy qoryna aqshasy salynbaǵan adamdar alatynyn atap ótti. Ondai adamdar kóbine aýyldyq jerdiń turǵyndary.
Osyǵan bailanysty májilismen jańa zeinetaqy reformasyn jasaqtap, eń tómengi zeinetaqyny eń tómengi jalaqy mólsherimen teńestirýdi usyndy.
