فوتو: Shutterstock.com
مەجٸلٸس دەپۋتاتى ەدٸل جۇبانوۆ ٷكٸمەتكە جاڭا زەينەتاقى رەفورماسىن جٷرگٸزٸپ, ەڭ تٶمەنگٸ زەينەتاقىنى ەڭ تٶمەنگٸ جالاقىمەن تەڭەستٸرۋدٸ ۇسىندى, دەپ حابارلايدى Sputnik قازاقستان.
دەپۋتاتتىڭ ايتۋىنشا, وتىز جىل ٸشٸندە ەلەۋمەتتٸك سالا بويىنشا شەشٸمٸن تاپپاعان ەڭ باستى مەسەلە – حالىقتىڭ ەلەۋمەتتٸك جاعدايىنىڭ تٶمەندٸگٸ.
"ەلٸمٸز باي بولسا دا, ەلەۋمەتتٸك قولداۋدى قاجەت ەتەتٸن از قامتىلعان حالىق سانى جىل سايىن ارتىپ وتىر.شىن مەنٸندە, 30 جىلدا ەڭ تٶمەنگٸ جالاقى مەن زەينەتاقىنى مٸسە تۇتىپ كەلەمٸز. بۇل حالىقتىڭ قارىزعا كٸرٸپ, نەسيەنٸڭ قۇرىعىنا تٷسۋگە يتەرمەلەيدٸ. مەملەكەت بەلگٸلەگەن ەڭ تٶمەنگٸ زەينەتاقى مٶلشەرi – 57 853 تەڭگەگە ٶمٸر سٷرۋ مٷمكٸن ەمەس", - دەيدٸ جۇبانوۆ ۆيتسە-پرەمەر تامارا دٷيسەنوۆاعا جولداعان دەپۋتاتتىق ساۋالىندا.
ونىڭ پٸكٸرٸنشە, قازاقستانعا زەينەتاقى جٷيەسٸن قايتا جاڭعىرتۋ كەرەك. بۇل رەتتە ەڭ از زەينەتاقى الاتىن زەينەتكەرلەردٸڭ زەينەتاقىسىن كٶبەيتۋدٸڭ ماڭىزى زور.
"زەينەتاقىنىڭ ەڭ تٶمەنگٸ بازالىق مٶلشەرلەمەسٸن ەڭ تٶمەنگٸ جالاقى مٶلشەرٸمەن تەڭەستٸرۋ قاجەت. زەينەتاقى جٷيەسٸندەگٸ تيٸمدٸ ٶزگەرٸستەر – زەينەتكەرلەردٸڭ ەلەۋمەتتٸك جاعدايىنىڭ, ٶمٸر سٷرۋ ساپاسىنىڭ از دا بولسا ارتۋىنىڭ بٸردەن-بٸر كٶرسەتكٸشٸ. بٸزدٸڭ ەلدە زەينەتكەردٸڭ ەڭ تٶمەنگٸ زەينەتاقىسى دەرٸ-دەرمەك پەن دۇرىس دەمالۋدى ايتپاعاندا, تاماعىنا ەرەڭ جەتەدٸ", - دەيدٸ مەجٸلٸسمەن.
جۇبانوۆ پرەزيدەنتتٸڭ تاپسىرماسىمەن كەلەسٸ جىلى ەڭ تٶمەنگٸ جالاقى 70 مىڭنان 85 مىڭ تەڭگەگە دەيٸن كٶتەرٸلەتٸنٸن ەسكە سالدى.
"ال, وسى ەڭ تٶمەنگٸ جالاقى مٶلشەرٸ ەڭ تٶمەنگٸ كٷنكٶرٸس دەڭگەيٸن ەسكەرە وتىرىپ بەكٸتٸلەدٸ. سوندىقتان دا زەينەتاقىنىڭ ەڭ تٶمەنگٸ مٶلشەرلەمەسٸن ەڭ تٶمەنگٸ جالاقىمەن تەڭەستٸرۋ – ٷكٸمەت الدىنداعى كەزەك كٷتتٸرمەيتٸن ٶزەكتٸ مەسەلەلەردٸڭ بٸرٸ بولۋى قاجەت دەپ ەسەپتەيمٸن. سەبەبٸ, مەملەكەت ازاماتتاردىڭ ەڭ تٶمەنگٸ جالاقى دەڭگەيٸنەن تٶمەن ەمەس زەينەتاقى الۋىنا كەپٸلدٸك بەرۋٸ قاجەت", - دەپ سانايدى دەپۋتات.
ايتۋىنشا, كەيبٸر ەلدەردە ادامنىڭ زەينەتاقىسى بەلگٸلەنگەن ەڭ تٶمەنگٸ مٶلشەردەن تٶمەن بولسا, وندا مۇنداي زەينەتكەرگە ەلەۋمەتتٸك ٷستەمەاقى تٶلەۋ تەجٸريبەسٸ بار.
جۇبانوۆ ەڭ تٶمەنگٸ زەينەتاقىنى ەڭبەك ٶتٸلٸمٸ جوق, زەينەتاقى قورىنا اقشاسى سالىنباعان ادامدار الاتىنىن اتاپ ٶتتٸ. ونداي ادامدار كٶبٸنە اۋىلدىق جەردٸڭ تۇرعىندارى.
وسىعان بايلانىستى مەجٸلٸسمەن جاڭا زەينەتاقى رەفورماسىن جاساقتاپ, ەڭ تٶمەنگٸ زەينەتاقىنى ەڭ تٶمەنگٸ جالاقى مٶلشەرٸمەن تەڭەستٸرۋدٸ ۇسىندى.
