Búgin Májilistiń jalpy otyrysynda «Aq jol» fraktsiiasynyń depýtaty Berik Dúisenbinov joǵarǵy oqý oryndarynyń jekemenshik jerlerine qatysty depýtattyq saýalyn joldady, dep habarlaidy "Ult aqparat".
Dúisenbinov atap ótkendei, ál-Farabi atyndaǵy Qazaq Ulttyq ýniversitetiniń jer aýmaǵy belgisiz sebeptermen azaiyp qalǵan jáne osy másele qoǵamdy alańdatyp otyr.
«Jer quqyǵy boiynsha sarapshy, zańger Baqytjan Bazarbektiń málimetterine súiensek, 2012 jylǵy 30 qańtardaǵy Almaty qalasy ákiminiń qaýlysyna sáikes Ýniversitettiń paidalaný quqyǵyna jalpy kólemi 73,26 gektar jer berilgen. Al, 2017 jyly 2 qazanda Almaty qalasy ákiminiń №4/392-22-36 degen qaýlysyna sáikes QazUÝ-niń jalpy jeri úlesterge bólinip, jer kólemi 72,48 gektar bolyp shyqty. Sonyń ishinde QazUÝ-niń tikelei úlesin alatyn bolsaq, ol –71,40 gektar jer, iaǵni, oqý ornynyń jalpy jer kólemi 1,8 gektarǵa azaiǵanyn baiqaimyz», - deidi depýtat.
«Ýniversitetke tiesili jer kólemi nege azaiǵan?» degen suraq eshqandai ýákiletti organ naqty jaýap bermegen. Berik Dúisenbinov atap ótkendei, jer máselesi tek bul ýniversitetpen ǵana shektelip otyrǵan joq.
«Elimizdiń ár aimaǵynda joǵarǵy oqý oryndarynyń jer telimderiniń jeke menshikke satylyp jatqanyn, stýdent jastar turatyn jatahanalardyń azaiyp, Ýniversitet menshigindegi oqý protsesterin qamtamasyz etetin qosymsha jyljymaityn múlik obektileriniń saýdaǵa salynyp jatqanynan buqaralyq aqparat quraldarynan jáne barlyǵyn kórip-bilip otyrǵan eldiń aýzynan estip júrmiz. Mysaly, Shyǵys Qazaqstan Memlekettik ýniversitetiniń bas ǵimaratynan on qadam qashyqtyqta ornalasqan óndiristik sheberhana búginde oiyn-saýyq ornyna ainalǵan», - dedi depýtat.
Atalǵan máselelerdiń mańyzdylyǵyn baiandaǵan «Aq jol» fraktsiiasynyń depýtattary birinshiden, Qazaq Ulttyq ýniversitetine tiesili jer aýmaǵynan jer ýchaskeleriniń bólinip shyǵarylǵany qanshalyqty zańdy ekenin tekserip, zańsyzdyq oryn alǵan jaǵdaida jaýapty adamdardy jaýapqa tartýdy, ekinshiden, osyndai tekserýdi oblystarda ornalasqan joǵarǵy oqý oryndarynda da júrgizip, nátijesin bizge habarlaýdy talap etti.
Ol osy másele boiynsha Bas prokýror Ǵizat Nurdáýletov pen Bilim jáne ǵylym ministri Ashat Aimaǵambetovke saýal joldady.
«Memleket múddesi men jastardyń bilim alý bolashaǵyn eskere otyryp, QazUÝ-ǵa tiesili jer aýmaǵynan ýchaskeler bólinip shyǵarylǵany qanshalyqty zańdy ekenin tekserip, zańsyzdyq bolǵan jaǵdaida jaýapty adamdardy jaýapqa tartýdy suraimyz», - dedi májilismen.
Áleýmettik jeli osy ýniversitettiń túlegi, jýrnalist-prodiýsser Serik Abas-shah zańger Baqytjan Bazarbekpen birge kópten beri dabyl qaǵyp júr. Ol Prezident Qasym-Jomart Toqaevtyń atyna úndeý joldaǵan bolatyn.
Ál-Farabi atyndaǵy Qazaq ulttyq ýniversitetine qarasty jerlerdiń kommertsiialyq maqsatta qoldanylýyna tyiym salýyńyzdy surai kele, jerdi berý jónindegi 2012 men 2017 jyldar aralyǵyndaǵy zańsyz sheshimderdi joqqa shyǵarýyńyzdy ótinemiz. Ókinishke qarai, ál-Farabi dańǵylynyń boiyndaǵy bei-bereket salynǵan qurylys nysandarynyń saldarynan almatylyqtardyń taza aýada serýendeitin jerleri de azaiyp barady. Bul sonymen qatar Almaty qalasynyń ekologiiasyna keri áserin tigizip jatyr. Ál-Farabidiń esimi berilgen QazUÝ-ǵa tiisti jerlerdi óz qalpynda saqtap, Almatyny serýendeýge yńǵaily saiajailar men skverlerdiń qalasyna ainaldyrýymyz – ál-Farabi babamyzdyń 1150 jyldyǵyna jasaǵan eń keremet syilyǵymyz bolar edi, – delingen Serik Abas-shah joldaǵan úndeýde.
Jaqynda Almaty ákimi turǵyndarǵa esep berý kezdesýinde osy máselege bailanysty óz jaýabyn bergeni bar.
QazUÝ-dyń jeri jeke menshikke berileiin dep jatqan joq. Qazirgi QazUÝ qaramaǵyndaǵy jer teliminiń barlyǵy ýniversitettiń óz quzyretinde. Eger ýniversitet basqa bireýge jer bergisi kelse, onda ákimdikke usynyspen shyǵýy kerek. Myna jer maǵan kerek emes, qaityp alyńyz degendei. Qazir ýniversitetke jańa rektor taǵaiyndaldy, ol kisimen de kezdestik. Bul másele tóńireginde de áńgime boldy. Ol kisi ýniversitetti ári qarai damytýymyz kerek, eshqandai jer berilmeidi, meniń usynysym sondai degendi bildirdi. Sondyqtan búgingi tańda bireýge jer bereiin dep jatqan áńgime joq, - dedi Baqytjan Saǵyntaev.
