2019 jylǵa arnalǵan respýblikalyq biýdjet týraly Zańǵa úkimettik túzetýlerdi talqylaý barysynda Májilis depýtaty Murat Temirjanov onyń kemshilikterin atady, dep habarlaidy QazAqparat.
«Meniń bir ǵana saýalym bar. Aýyl sharýashylyǵyn nege sonshalyqty jaqsy kórmeisizder? Suraqty nelikten bulai qoiyp otyrmyn. Siz ózińizdiń sóz sóileýińiz barysynda syiaqy kýpony týraly aittyńyz. Men úshin, nelikten 17 mlrd teńgeni alyp qoimaq bolyp otyrǵandaryńyz múldem túsiniksiz. Zań jobasynyń qazirgi ýaqytta Senat qaraýyna jatqanyna jáne onyń taiaý aralyqta qabyldanatyndyǵyna qandai kepil bar? Aýyl sharýashylyǵy ministrligi, baǵdarlama ákimshisi odan keiin bul aqshany qalai alady? Bul qarajattyń biýdjetke qaitarylýyna kim bastamashy boldy?», - dedi Májilis depýtaty talqylaý barysynda QR Qarjy vitse-ministri Berik Sholpanqulovqa qarata.
Sonymen qatar ol «Nur Otan» partiiasynyń «Qazaqstan 2021: birlik, turaqtylyq, jasampazdyq» atty sailaýaldy baǵdarlamasynda sýbsidiialaý júiesin jetildirýge baǵyttalǵan birneshe pozitsiianyń bolǵanyn eske saldy. Al qazirgi respýblikalyq biýdjet túzetýinde asyl tuqymdy mal sharýashylyǵyn sýbsidiialaý jáne damytýǵa, mal sharýashylyǵynyń ónimdiligin ári ónim sapasyn arttyrýǵa kózdelgen 36,5 mlrd teńge qoldaý tappaǵandyǵyna nazar aýdartty.
«Sizder, qarjygerler jem-shóp bazasy bolmasa mal sharýashylyǵy da bolmaityndyǵyn qalai túsinbeisizder. Al mal sharýashylyǵymyz bolmasa, onda dúken sórelerinde ettiń ózi de bolmaidy. Bul tizbekter bir-birimen bailanysty. Tiimsiz sýbsidiialardan bas tartý mindeti qoiylǵandyǵy túsinikti. Biraq, bul saladaǵy barlyq sýbsidiiany alyp tastaý kerek degendi bildirmeidi. Búginde aýyl sharýashylyǵy taýaryn óndirýshilerimiz onsyz da qiyn jaǵdaiǵa tap bolyp otyr. Aýa raiy nashar bolyp tur. Qajetti astyqty bastyryp úlgermeimiz, eki ret qurǵaqshylyq oryn aldy. Al sizder ekonomikanyń shynaiy sektoryn qoldaýdy qysqartyp jatyrsyzdar. Bul men úshin túbegeili túsiniksiz jait. Mundai túrde bul biýdjet qabyldanbaýy tiis», - dedi depýtat.
Joǵarydaǵy saýaldarǵa jaýap bergen qarjy vitse-ministriniń aitýynsha, syiaqyǵa kýpon boiynsha sýbsidiia tóleýge kózdelgen 16,7 mlrd teńge qysqartylǵan. Degenmen bul soma rezervte tur. Al aýyl sharýashylyǵyn sýbsidiialaýǵa kózdelgen 36 mlrd teńgege qatysty ótinim Aýyl sharýashylyǵy tarapynan túskenin aitty.
