Májilis depýtaty Amanjol Áltai tegin úiirmeler men sporttyq sektsiialardy aýyl balalaryna qoljetimdi etý mehanizmderin oilastyrýdy usyndy, dep habarlaidy QazAqparat.
«Balalardy mádeniet jáne sport baǵytyndaǵy qosymsha bilimmen, sport jáne shyǵarmashylyq úiirmelermen qamtý úshin 5,8 mlrd qarajat qarastyrylǵan. 1523 mektepten tys qosymsha bilim berý uiymynda 1,1 mln bala úiirmelerge qatysady. Jalpy 2022 jyly qosymsha bilim berýmen qamtylǵan balalar 2 461 775 balany quraidy. Onyń 43,68%-y nemese 1 502 951 bala qalada turady. Qalǵan 26,7 %-y nemese 958 824 bala aýylda», - dedi ol QR Premer-Ministriniń orynbasary Eraly Toǵjanovtyń atyna joldaǵan saýalynda.
Depýtattyń málimeti boiynsha, buqaralyq aqparat quraldarynda, áleýmettik jelilerde balalar úshin qarastyrylyp jatqan osy qarajattardyń igerilýi jaiynda keraǵar aqparattar bar.
«Maqsatty qarastyrylǵan qarajattyń jumsalýyna senimsizdik bildirgen ata-analar da kóptep kezdesedi. Sonymen qatar memlekettik tapsyrysty alyp otyrǵan zańdy tulǵalardyń kópshiligi sol memlekettik tapsyrysty ornalastyrýshy organnyń qyzmetkerleriniń týysqandary, tanystary ekenin de jii aitady. Oqýshylardy formaldi túrde tirkep qoiyp, memlekettik tapsyrysty talan-tarajǵa salýǵa jol berilmeýi tiis», - degen depýtat ózi ataǵan olqylyqtardy joiýǵa baǵyttalǵan birneshe usynys aitty.
Olar:
1. QR Mádeniet jáne sport ministrligi men Bilim jáne ǵylym ministrligi qosymsha bilimge bólingen qarajattyń tiimdiligin baǵalaý jáne esep berý kriteriileri anyqtaýy kerek;
2. QR Bilim jáne ǵylym ministrligine qarasty NOBD Ulttyq bilim berýdiń málimetter bazasyndaǵy málimetteri men artsport.edu.kz platformasynyń málimetterin birizdendirý;
3. Memlekettik tapsyrysty alyp otyrǵan zańdy tulǵalarǵa qoiylatyn talaptardy kúsheitý;
4. Qosymsha bilim berýge ornalastyrylǵan memlekettik bilim berý tapsyrysyn baqylaý, monitoring júrgizý tetikteri bekitý;
5. Qosymsha bilim berýdiń bir baǵyty retinde tarihi, mádeni murany, ulttyq qundylyqtardy nasihattaityn, otansúigishtik, patriottyq sezimderdi damytatyn úiirmeler jumysyn jolǵa qoiý;
6. Memlekettik tapsyrysty alyp otyrǵan zańdy tulǵalardyń balalarǵa usynatyn baǵdarlamalardy saraptamadan ótkizip, avtorlyq quqyq negizinde halyqqa qoljetimdi bolýyn qamtamasyz etý;
7. Qosymsha bilim alý men tegin úiirmelerdi, sporttyq sektsiialardy aýyl balalaryna qoljetimdi etý mehanizmderin oilastyrý.
