Parlament Májilisiniń jalpy otyrysynda «Qazaqstan Respýblikasyndaǵy sailaý týraly» Qazaqstan Respýblikasynyń Konstitýtsiialyq zańyna ózgerister men tolyqtyrýlar engizý týraly» Qazaqstan Respýblikasy Konstitýtsiialyq zańynyń jobasy maquldandy, dep habarlaidy QazAqparat agenttigi.
Zań jobasyn qabyldaýdyń maqsaty - biliktiń ókildi tarmaǵynda áielderdiń jáne jastardyń, sondai-aq múgedektigi bar adamdardyń da qatysýyn qamtamasyz etý jáne pikirin eskerý, olardy memlekettiń tynys-tirshiliginde belsendi jumysqa tartý.
«Konstitýtsiiaǵa sáikes Qazaqstan Respýblikasy ózin áleýmettik memleket retinde ornyqtyrady, azamattar aldyndaǵy áleýmettik mindettemelerdi oryndaýǵa baǵyttalǵan saiasatty dáiekti túrde iske asyrady. Memleketimiz saiasatty qalyptastyrýǵa halyqty tartýǵa erekshe nazar aýdarady. 2020 jylǵy mamyrda «Saiasi partiialar týraly» Zańǵa partiialyq tizimderde áielder men jastar úshin 30% kvota engizý jónindegi normalar engizildi. Sol kezden bastap saiasi partiialar genderlik teńdik jáne jastardy qoldaý máselelerin jetildirýde mańyzdy ról atqara bastady. Sailaý tizimderine engizý arqyly jas kandidattar men áielderdi ókildi organdar qataryna qosý múmkindigi paida boldy», - dedi QR Ádilet ministri Qanat Mýsin.
Onyń aitýynsha, kvotalaý tetigi qoǵamdaǵy problemalyq jáne sezimtal máselelerdi sheshý kezinde ártúrli pikirlerdi eskerý arqyly norma shyǵarmashylyq protsesinde «qoǵamdyq kún tártibin» qalyptastyrý múmkindigin keńeitti.
«Osy tetikti damytý úshin Memleket basshysy óziniń 2021 jylǵy Qazaqstan halqyna Joldaýynda erekshe qajettilikteri bar adamdardyń zańnamalyq qyzmette qatysý qajettiligin atap ótti. Osy tapsyrmany iske asyrý maqsatynda usynylǵan «Qazaqstan Respýblikasynyń keibir konstitýtsiialyq zańdaryna ózgerister men tolyqtyrýlar engizý týraly» Konstitýtsiialyq zań jobasy ázirlendi. Konstitýtsiialyq zań jobasy áielder, 29 tolmaǵan adamdar jáne múgedek adamdar úshin 30% kvotadan basqa, olardy Parlament Májilisinde depýtattyq mandattardy bólý kezinde esepke alý qajettiligin bekitýdi kózdeidi», - dedi Q. Mýsin.
«Usynylyp otyrǵan Konstitýtsiialyq zań jobasy nysanaly toptarmen ártúrli alańdarda qaraldy. Jalpy alǵanda, bul túzetýler áielderdiń, jastardyń, erekshe qajettilikteri bar adamdardyń elimizdiń zań shyǵarý organynda ókildigin keńeitý úshin mańyzdy qadam bolyp sanalatynyn atap ótken jón. Bul zańdardyń sapasyna sózsiz áser etedi», - dedi Ádilet ministri.
Atap aitqanda, zań jobasynyń erejelerin retteýdiń máni biliktiń ókildi tarmaǵynda depýtattyq mandattardy bólýge, sondai-aq kvotalanatyn adamdardyń tizbesine bailanysty qoǵamdyq qatynastar bolyp sanalady. Óitkeni áielder men jastardan basqa, múgedektigi bar adamdar úshin de mindetti kvota belgileý usynylady.
