Búgin Májilistiń jalpy otyrysynda depýtattar "Qazaqstan Respýblikasynyń keibir zańnamalyq aktilerine jer qatynastaryn retteý máseleleri boiynsha ózgerister men tolyqtyrýlar engizý týraly" zań jobasyn ekinshi oqylymda maquldap, senatqa jóneltti, dep habarlaidy "Ult Aqparat" Sputnik Qazaqstan-ǵa silteme jasap.
Aita keteiik, bul qujat Jer reformasy jónindegi komissiia jumysynyń nátijesinde ázirlengen bolatyn. Komissiianyń barlyq usynysy zań jobasyna enip otyr.
"Máselen, zań jobasynda jarǵylyq kapitalynda sheteldikterdiń nemese sheteldik zańdy tulǵalardyń úlesi bar birlesken kásiporyndarǵa aýyl sharýashylyq jerlerin jalǵa berýge moratoriidiń qoldanylýy keńeitiledi. Endi jarǵylyq kapitalǵa sheteldik qatysýdyń kez kelgen paiyzy jer ýchaskesine tiisti quqyqtardy almaýǵa sebep bolady. Osylaisha, aýyl sharýashylyǵy maqsatyndaǵy jerler 2021 jylǵy 31 jeltoqsanǵa deiin sheteldik jer paidalanýshylarǵa jalǵa berilmeidi. Barlyq jeke jáne zańdy tulǵalardyń jeke menshigine de berilmeitin bolady. Al respýblika azamattaryna jáne sheteldikter qatyspaityn zańdy tulǵalarǵa aýyl sharýashylyǵy maqsatyndaǵy jerler ýaqytsha jerdi paidalaný quqyǵymen ǵana beriledi", — dep baiandady otyrysta agrarlyq máseleler komitetiniń múshesi Berik Ospanov.
Budan bólek, depýtattyń aitýynsha, otandyq jer paidalanýshylarǵa jerdi jalǵa berý institýtyn jetildirý kózdelip otyr.
"Ol úshin aýyl sharýashylyǵy maqsatyndaǵy jerlerdi konkýrstyq negizde jalǵa berý tártibin egjei-tegjei retteitin normalar engizilip otyr. Konkýrstardyń ashyqtyǵyn qamtamasyz etý úshin jer komissiialarynyń quramyna memlekettik organdardyń qyzmetkerlerinen bólek qoǵam ókilderi de kiretin bolady. Sondai-aq, zań jobasynyń erejelerine turaqty monitoring engizý arqyly aýyl sharýashylyǵy jerleriniń utymdy paidalanylýyn baqylaýdy kúsheitý kózdelgen. Bul sharalar aýyl sharýashylyǵy maqsatyndaǵy jerlerdi tiimdi ári utymdy paidalanýǵa, paidalanylmai jatqan jerlerdi ýaqtyly anyqtaýǵa jáne olardy sharýashylyq ainalymǵa tartýǵa, sondai-aq, qoǵamdyq baqylaýdy arttyrýǵa múmkindik beredi", — dedi depýtat.
Sonymen qatar, qazaqstandyqtarǵa jalǵa beriletin aýyl sharýashylyq maqsatyndaǵy jerdiń shekti mólsheri belgilenbek. Shekara mańyndaǵy jerlerdi berý talaptary da aiqyndalǵan.
