Qazaqstan halqy Assambleiasynan QR Parlamenti Májilisiniń depýtattary Qoldanbaly etnosaiasi zertteýler institýtynyń jumysymen tanysty, dep habarlaidy QazAqparat.
«Búgingi is-shara barysynda depýttar institýttyń iske asyryp jatqan jobalarymen tanysty. Olar 2020 jyly biz qamtyǵan jobalardyń mańyzdylyǵyn, sondai-aq institýt jumysynyń joǵary nátijeliligin atap ótti. Osy oraida kúsh-jigirdi etnomádeni birlestiktermen shoǵyrlandyrý jáne etnomádeni birlestikter resýrstaryn paidalanýdy usyndy. Munymen qosa, bizdiń institýt júrgizetin zertteýler aiasynda depýtattarmen birge óńirlerge saparmen barýdyń qajettigi aityldy. Biz ózimizdiń monitoringti júrgizemiz, sonymen qatar depýtattar óńirlerge saparlaǵanda birlese jumystardy atqarmaqpyz», - dedi «Qoldanbaly etnosaiasi zertteýler institýty» JShS direktory Talǵat Qaliev.
Institýt basshysynyń paiymynsha, óńirlerdegi máselelerdi sheshýde Parlament depýtattarymen birlese jumys isteý eleýli nátije beredi.
«Etnosaralyq qatynastar boiynsha ári osy saladaǵy zertteýlerde, jumystarda únemdeý bolmaýy kerek degen paiym aityldy. Jalpy, bul baǵytta zertteý jumystary laiyqty deńgeide bolǵany abzal. 2020 jyly koronavirýs indetine bailanysty keibir kedergiler bolǵanymen, biraz zertteýler júrgizildi. Alǵa qoiylǵan maqsattar oryndaldy. Byltyr institýt qurylǵannan keiin jeti aidyń ishinde aýqymdy material jinap úlgerdik. Osy materialdardy búgin depýtattarǵa tanystyrdyq. Atap aitqanda, institýt mamandary jinaqtaǵan taldaý materialdaryna toqtalsaq, buǵan deiin zerttelmegen ári asa mán berilmegen jekelei problemalar anyqtaldy», - dedi Talǵat Qaliev.
