Parlament Májilisiniń depýtattary kiikterdi qorǵaý boiynsha mindetin oryndaý barysynda qaza tapqan inspektor Erlan Nurǵalievke «Halyq qaharmany» ataǵyn berýdi usyndy, dep habarlaidy "Ult aqparat".
«13 qańtar kúni Qaraǵandy oblysynyń Nura aýdanynda memlekettik qoryq aýmaǵynda zańsyz kiik atqan brakoner-qaraqshylardyń qolynan qoryqshy Erlan Nurǵaliev qaza tapty. Bul oqiǵa búkil Qazaqstan qoǵamyn dúr silkintip, BAQ-ta, áleýmettik jelilerde keńinen jariialanyp, qyzý talqylanýda. Osy jaǵdai qoǵamdaǵy birneshe problemalardyń basyn ashty. Ǵasyrlar boiy saiyn dalamyzda halqymyzben birge ósip-óngen, tórt túligimizdei bolǵan asyl qazynamyzdyń biri - kiikterdi qandy qol qaraqshy-brakonerlerden áli kúnge deiin qorǵai almai otyrǵanymyz qalyń jurtqa jariia boldy. Janýarlardy múiizi úshin qynadai qyrǵan brakonerlik-qaraqshylyq tyiylmai tur. Oǵan qosa sońǵy jyldary oryn alǵan tabiǵi apattar - kiikterdiń qyrylýy Qazaqstandaǵy kiikterdiń jer betinen múlde joiylyp ketýine ulasýy múmkin degen qaýipke negiz bolyp otyr», - dep toqtaldy depýtat Jambyl Ahmetbekov Parlament Májilisiniń jalpy otyrysynda Premer-Ministrdiń atyna joldaǵan saýalda.
Onyń sózine qaraǵanda, 2018 jyly qoryqshylarǵa shabýyl jasaýdyń 4 faktisi tirkelipti. Qoryqshylyq jumystyń qaýiptiligine bailanysty maman az, jalaqysy tómen - 50-70 myń teńge kóleminde. Qarýly qaraqshylardy ustaý kezinde qarý qoldanǵan qoryqshylardyń ózderi jaýapqa tartylǵan jaǵdailar kezdesedi, iaǵni qoryqshylar zańmen de jetkilikti dárejede qorǵalmaǵan.
«Qoryqshy Erlan Nurǵalievtyń qazasy qoǵamnyń biteý jarasyndai bolyp syzdap jatqan osyndai problemalaryn ashyp, jariia etti. Ómiriniń sońyna deiin antyna adal bolyp, memlekettik qyzmet kezinde sháiit ketken arysymyz Erlandy búkil qoǵam, jurtshylyq bolyp joǵary memlekettik nagradaǵa usynýda. Tipti eriktiler qaharman uldy máńgi este qaldyrý úshin onyń dala erkesi quralaidy qushaqtap turǵan sýretiniń negizinde eskertkish turǵyzý úshin qarjy jinaýdy bastap ta ketti. Munyń bári halyqtyń qaharman ulynyń erligin joǵary baǵalaitynyn kórsetedi. Qaraqshylarmen shaiqasta batyrlyq kórsetken Erlannyń serigi P.A.Nitsyk te memlekettik marapatqa laiyq dep esepteimiz. Májilistegi «Halyq kommýnisteri» Fraktsiiasynyń músheleri, jurtshylyqtyń pikirine qoldaý bildire otyryp, óz ómirin týǵan jeri men týǵan tabiǵatyn qorǵaý kezinde qandy qol qaraqshylardyń qolynan qaza tapqan Erlan Nurǵalievke «Halyq qaharmany» ataǵyn berýdi usynady jáne onyń esimin máńgi este qaldyrý boiynsha tiisti sharalar qabyldaýdy suraimyz. Marqum Erlan Nurǵaliev syn saǵatta, sońǵy demi úzilgenshe antyna adal kúiinde qaldy. Erlannyń ómiri óskeleń urpaq úshin jarqyn úlgi», - dedi Jambyl Ahmetbekov.
