Májilis depýtattary Nurlybek Ojaev, Dúisenbai Turǵanov jáne Sálimjan Naqpaev Atyraý oblysyna sapar barysynda «Himik-Atyraý» baý-baqsha qoǵamy eldi mekeniniń turǵyndarymen kezdesti, dep habarlaidy QazAqparat tómengi palatanyń baspasóz qyzmetine silteme jasap.
Depýtattar jergilikti halyqpen áleýmettik ahýaldy ońaltýǵa qatysty qordalanǵan problemalardy talqylady.
Turǵyndardyń basty máselesi – áleýmettik qoldaý túrleri. Iaǵni, eń aldymen, eldi mekenge naqty mártebe berý. Joǵary kerneýli jeli júrgizý, kóshe jaryǵyn qondyrý. Sondai-aq, balalar úshin oiyn alańdaryn salý.
Naqty ahýalmen tanysqan Májilis depýtattary atalǵan problemalardy nazarǵa alyp, sheshý joldaryn qarastyratyndaryn aitty. Kezdesýde Májilis depýtaty Dúisenbai Turǵanov atalǵan máselelerge naqty kim jaýapty ekenin anyqtap, jumystyń aiaqtalar merzimin, qandai nátijege jetetinin belgili bolatyndai júieli jumys jasaý kerektigin aitty.
Jalpy, Atyraý qalasyna qarasty baý-baqsha qoǵamdaryna bailanysty aqparatqa sai, oblys ortalyǵynda jalpy kólemi 875 ga, 8085 jer ýchaskesin quraityn 45 baý-baqsha qoǵamdary bar. Onyń ishinde 32 baý-baqsha qoǵamynda sýarý júiesi bar. 4426 ýchaske 524 ga jer igerilgen. Turǵyn úiler sany – 3497, saiajailar – 929. Igerilmegeni – 348 ga, iaǵni, 3659 ýchaske.
Aǵymdaǵy jyly múmkindigine qarai demeýshilikpen 15 baǵbandyq qoǵamǵa buryn paidalanylǵan elektr transformatorlaryn, paidalanylǵan sorǵylardy aýystyrý, gaz qubyryndaǵy gaz qysymyn arttyrý túrinde kómek kórsetildi. Aldaǵy ýaqytta josparly túrde baý-baqsha qoǵamdaryna kómek kórsetý qarastyrylýda.
Al, májilis depýtattary arnai barǵan «Himik» baý-baqsha qoǵamynyń kólemi – 64 ga, 597 ýchaske. Bunyń ishinde igerilgeni – 540 ýchaske (450 turǵyn úi, 90 saiajai). Igerilmegeni – 57 ýchaske (4,5 ga). Byltyr atalǵan eldi mekendi qoldaý baǵytynda kómek túrleri kórsetilgen. Iaǵni, demeýshiler esebinen uzyndyǵy 30 m Ø 315 sýarý qubyry berildi.
