Parlament Májilisiniń jalpy otyrysynda «Qazaqstan Respýblikasynyń biologiialyq qaýipsizdigi týraly» zań jobasy birinshi oqylymda maquldandy, dep habarlaidy QazAqparat.
Zań jobasyn Densaýlyq saqtaý ministrligi Memleket basshysynyń 2020 jylǵy 27 mamyrda Ulttyq qoǵamdyq senim keńesiniń otyrysynda jáne 2020 jylǵy 16 qarashada koronavirýstyq infektsiia jónindegi keńeste bergen tapsyrmalaryn oryndaý maqsatynda múddeli memlekettik organdarmen birlese otyryp ázirledi.
«Zań jobasynyń basty tujyrymdamasy biologiialyq qaýip-qaterlerdi erte anyqtaý, olardy boldyrmaý jáne aldyn alý bolyp otyr. Biologiialyq qaýip-qaterlerdiń negizgi kózderi mynalar bolyp sanalady: asa qaýipti infektsiialardyń tabiǵi oshaqtary, halyq pen janýarlardyń belsendi qozǵalysynyń, taýarlar ainalymynyń nátijesinde qaýipti infektsiialardyń ákelinýi», - dedi QR Densaýlyq saqtaý ministri Aleksei Tsoi.
Sonymen qatar ministr biologiialyq qaýip-qaterlerdiń kózi retinde patogendi bioagentterge ruqsatsyz qol jetkizý, olardyń rettelmeitin jáne erkin ainalymy, tótenshe jaǵdailar jáne terrorizm aktileri nátijesinde joǵary qaýipti kózderge áser etý, bioqaýipsizdik salasynda bilikti kadrlardyń jetispeýshiligi máselesin atady.
Aleksei Tsoidyń paiymynsha, mundai qaýip-qaterlerge qarsy is-qimyldyń tiimdi júiesin qalyptastyrý talap etiledi. Ol úshin zań jobasynda:
1) Qazaqstan Respýblikasynyń Ulttyq qaýipsizdik strategiiasy;
2) bioagenttermen jumys isteýge qoiylatyn talaptardy birizdendirý;
3) mikroorganizmderdiń ulttyq jáne jumys kollektsiialarynyń qyzmetin reglamentteý;
4) úilesimdi memlekettik basqarý júiesin qurý;
5) patogendi bioagentterdiń ainalymy týraly derekterdi esepke alý men monitoringteýdiń biryńǵai júiesin qurý;
6) biotáýekelderdi basqarý júiesin engizý;
7) biologiialyq qaýip-qaterlerdi boljaý júiesin qurý;
8) profildi qyzmetter men halyqtyń tótenshe yqtimal jaǵdailarǵa daiyndyǵyn qamtamasyz etý;
9) memlekettik retteýdiń preventivti fýnktsiiasyn kúsheitý aiasynda retteý usynylady.
Belgili bolǵandai, Respýblikalyq biýdjettik komissiia zań jobasyn iske asyrýǵa shamamen 25 mlrd teńge mólsherinde 2022-2024 jyldarǵa arnalǵan shyǵystardy maquldady. Bul shyǵystarǵa beiindi qyzmetkerlerdi áleýmettik qorǵaý, memlekettik zerthanalyq bazany qosymsha jaraqtandyrý, bioqaýipsizdik salasynda biryńǵai memlekettik aqparattyq júieni qurý jáne júrgizý, mikroorganizmder kollektsiiasyn ustap turý shyǵystary kiredi.
