Foto: Baq.kz
Májilis 2025-2027 jyldarǵa arnalǵan respýblikalyq biýdjet jáne Ulttyq qordan kepildendirilgen transfert týraly zań jobalaryn qabyldady. Bul qujattar elimizdiń áleýmettik-ekonomikalyq damý boljamdary men Memleket basshysynyń tapsyrmalaryna sáikes ázirlengenin Ult.kz habarlaidy.
2025-2027 jyldarǵa arnalǵan biýdjette kirister men shyǵystar boljamy kórsetilgen. Atap aitqanda, kirister 2025 jyly 15,6 trln teńge, 2026 jyly 16,7 trln teńge, al 2027 jyly 18,2 trln teńge deńgeiinde bolady dep kútilýde. Al shyǵystar 2025 jyly 25,8 trln teńge, 2026 jyly 23,2 trln teńge, 2027 jyly 24,6 trln teńge bolady dep boljanǵan. Osy kezeńde Ulttyq qordan kepildendirilgen transfertterdiń kólemi jyl saiyn 2 trln teńgeni quraidy.
Respýblikalyq biýdjet shyǵystarynyń 68%-dan astamy Qazaqstannyń 2029 jylǵa deiingi Ulttyq damý josparyna, ulttyq jobalarǵa jáne basqa da strategiialyq qujattarǵa sáikes belgilengen maqsattardy júzege asyrýǵa baǵyttalady.
Biýdjet jobasyn ázirleýde jumys toptarynyń jetekshisi Erkin Ábil ekonomikanyń turaqty ósýine úmit artylyp otyrǵanyn atap ótti. Orta eseppen jyl saiynǵy ósim 5,4%-dy quraidy dep kútilýde. Ósim ásirese óńdeý ónerkásibi (5,8%), qurylys (9,3%) jáne aqparat pen bailanys (9,5%) salalarynda baiqalmaq.
Sonymen qatar, bul biýdjet jobasy áleýmettik mindettemelerdi oryndaýǵa, memlekettik qyzmetshilerdiń jalaqysy, zeinetaqy jáne stipendiiany kezeń-kezeńimen arttyrýǵa múmkindik beredi.
