Aýǵanstannyń Mazari-Sharif qalasynda qazaqstandyq astyq terminalyn ne un qoimasyn salýdyń qajeti joq. Bul jaiynda Májilis depýtattarynyń resmi saýalyna jaýap bergen QR Premer-Ministri Asqar Mamin aitty, dep habarlaidy "Ult aqparat".
Aita keterligi, Májilistiń bir top depýtaty Úkimet basshysynyń atyna joldaǵan saýalynda Qazaqstannyń astyǵy men unyn aýǵan jáne túrikmen naryǵyna shyǵarý úshin Aýǵanstan Respýblikasynyń Mazari-Sharif qalasynda nemese ózge shekaralas qalada astyq elevatoryn ne un qoimasyn salý múmkinshiligin qarastyrýdy usynǵan bolatyn. Depýtattardyń atap ótýinshe, mundai terminal ne qoima Aýǵanstan aýmaǵynda astyq pen un saýdasynyń jandanýyna septigin tigizedi.
Osy máselege qatysty resmi jaýap bergen Asqar Mamin 2018 jyly «Qazaqstan temir joly» kompaniiasy «Ýzbekiston temir iýllari» AQ, «Týrkmendemiriollary» agenttigi, Túrikmenstan Temir jol kóligi ministrligi jáne Aýǵanstan temir joldary basqarmasynyń, múddeli uiymdardyń qatysýymen kópjaqty kezdesý ótkizgen. Onda Qazaqstan tarapynyń Aýǵanstan aýmaǵynda terminaldar, astyq elevatory men un qoimasyn salýy máselesin qarastyrǵan.
«Sarapshylar ózbek-aýǵan jáne túrikmen-aýǵan shekarasyndaǵy kólik-logistikalyq infraqurylymdy baǵalai kele, qoldanystaǵy terminaldardyń tolyq júktemege ie bolmai qalý táýekeline bailanysty qazaqstandyq taraptyń qosymsha terminal men elevator salýy maqsatqa sai emes degen qorytyndyǵa keldi», - dedi Premer-Ministr.
