QR Bas memlekettik sanitarlyq dárigeri, Qoǵamdyq densaýlyq saqtaý komitetiniń tóraǵasy Jandarbek Bekshin mereke kúnderi ýlanýdyń aldyn alý boiynsha birqatar keńes berdi, dep habarlaidy QazAqparat tilshisi.
Ol jańajyldyq dastarhannyń bai ári densaýlyqqa paidaly bolýy qajettigin eske saldy.
«Ásirese úlkender maily jáne tym tátti taǵamdardan boiyn aýlaq ustaǵany jón. Salat pen sýsyndy jáne jemis-jidekti kóbirek qoiý kerek. Taýyq pen balyq etterin aǵza ońai qorytady, árine termoóńdeýden ótken qaýipsiz bolsyn. Qazaqsha pisken etti de azdap qoiýǵa bolady. Eń bastysy barlyq taǵamdy ústel ústine shyǵarmai, tońazytqyshtan az portsiiamen alyp tutynǵan durys», - dedi bas sanitarlyq dáriger Ortalyq kommýnikatsiialar qyzmetinde ótken baspasóz máslihatynda.
Sonymen birge, ol taǵamdy jetkilikti etip keshke ǵana ázirleýge, merekeden qalǵan taǵamdy uzaq saqtamaýǵa keńes berdi.
«Merekeden keiin asta-tók taǵamdy laqtyrýǵa qimaityndar bar. Biraq, ýlanyp aýyrǵanda kerisinshe, ókinedi. Salattar tońazytqyshta 24 saǵat qana saqtalady, maionez qosylǵan salattardyń jaramdylyǵy - 6 saǵat qana. Sondyqtan, jeýge qajetti taǵamdardy der kezinde ázirlep, qalǵanyn azyq-túlik plenkasymen saqtaý kerek», - dedi J. Bekshin.
Bas dárigerdiń aitýynsha, dúkennen azyq-túlik alǵanda jaramdylyq merzimi anyq kórinetin taýarlardy alý kerek. Úide taǵam ázirlegende bir rettik qolǵap kiip, et pen kókónisterdi bólek pyshaqpen týraǵan jón.
