Foto: TJM
Maiqaiyń kenishinde qulaǵan avtobýsta qalǵan eki adamnyń týystary kómek surap Astanaǵa keldi, dep habarlaidy «Ult aqparat» KTK-ǵa silteme jasap.
Apattyń bolǵanyna úsh aiǵa jýyqtasa da, qutqarýshy men avtobýs júrgizýshisiniń máiiti áli tabylǵan joq. Al izdeý jumystary toqtap tur.
Marqumnyń jaqyndary qutqarý jumystaryn jalǵastyrýdy talap etýde. Pavlodar oblysynyń ákimdigi men jergilikti prokýratýradan kúder úzgen olar endi jaǵdaiǵa prezidenttiń aralasýyn surap otyr.
Qutqarýshy Aidos Sháimerdenniń áieli Astanaǵa shiettei bala-shaǵasyn ertip kelgen. "Asyraýshymnan aiyryldym, bes balamdy endi kim asyraidy" dep kóz jasyna erik berdi. "Jubaiymnyń máiitin taýyp berse, ǵurypqa sai jerlesek" deidi. Pavlodarda izdeý jumystaryn jalǵastyrýdy surap, ákimdik pen prokýratýranyń tabaldyryǵyn tozdyrǵan Nursulý esh shara qalmaǵan soń, úkimetten, Bas prokýratýradan kómek surap otyr.
"Bizdi estitin pende joq. Kishkentai balalarymdy alyp Astananyń tórine kelip otyrmyn, alyp berse eken, shyǵaryp berse eken deimin. Tiri emes ekenine kóndik qoi, tiri deiin desem, úide joq, óli deiin desem, beiit basy joq", - deidi Nursulý Sháimerden.
Topyraq astynda qalǵan eki adam áli kúnge sheiin apattan qutqarý qyzmetiniń jumysshylary retinde eseptelip, olarǵa ai saiyn jalaqy tólenip otyr eken. Máiit tabylmaǵandyqtan, qaitys bolǵany týraly kýálik te joq. Sol sebepti eki otbasyǵa ótemaqy tólenbegen, asyraýshysynan aiyrylǵanyn otbasy retinde járdemaqy da ala almaidy. Avtobýs júrgizýshisi Aiyp Tileýbergenovtiń jaqyndary istiń sozylyp ketkenine narazy.
"Tórt kisiniń ólimine kombinat jaýap bergisi kelmei, aǵamyzdyń jumys orny, qutqarýshylarmen sottasaiyn dep jatyr, solardy kináli qylǵysy kelip jatyr. Jer solardiki, oiylyp ketken jer solardyń qatelikterinen, salǵyrttyǵynan boldy, ony moiyndaǵysy kelip turǵan joq. "Bizdiń kinámiz joq" dep otyr", - deidi avtobýs júrgizýshisiniń týysy Amangeldi Tileýbergenov.
Izdeý jumystary qashan jandanatynyn tótenshe jaǵdailar ministrligi de aita almady. Qazba jumysynyń toqtaǵanyna bir ai ótse de, saraptama jasalmaǵan.
"Eki jaq saraptama júrgizip, qutqarýshylar úshin qazba jumystary qanshalyqty qaýipsiz ekenine sheshim qabyldaýy tiis. Sarapshylar qaýip joq dep sheshse, árine, izdeý jumystary qaita jandanady", - deidi TJM vitse-ministri Baýyrjan Syzdyqov.
Indýstriia ministri ken ornynda óndiristik qaýipsizdikke qarjy az bólinetinin moiyndady.
"Bul jaǵdaidy Pavlodar ákimimen talqyladyq, investorǵa qatysty naqty sheshimder qabyldaimyz" - dedi Sharlapaev.
"Buǵan deiin istegenimizdei, aktsionermen tikelei dialog qurmaqpyz. Ol kenishtegi óndiristik qaýipsizdik pen ken ornyn igerýdi óz moinyna alady nemese naqty osy investordyń jer qoinaýyn paidalaný quqyǵy máselesin qaita qaraityn bolamyz. Bir sheshimge kelemiz", - dedi indýstriia jáne infraqurylymdyq damý ministri Qanat Sharlapaev
Avtobýspen birge topyraq astynda qalǵan eki adam áli joǵalǵandar sanatynda. Al olardyń otbasy zardap shegýshi retinde tanylmaǵan. Pavlodardan kómek surap kelgen qaýymdy úkimettegiler Bas prokýratýraǵa, ondaǵylar ainalyp kelip oblys prokýroryna qaita baǵyttapty.
