Qazaqstanda maiqan balyǵyn satýǵa zańdy túrde tyiym salynady. Atalǵan shara Marqakól kólindegi brakonerliktiń aldyn alýǵa baǵyttalǵan, dep habarlaidy QazAqparat.
«Birinshiden, maiqandy zańsyz aýlaý jaǵdaiy azaimai tur. Ekinshiden, ol balyqty sýquzǵyn keremet aýlaidy. Jergilikti turǵyndarǵa maiqandy aýlaýǵa ruqsat berilgen. Belgili bir limit bar. Alaida, osy múmkindikti teris paidalaný jaǵdaiy barshylyq. Bul máseleni retteý úshin zańnamaǵa ózgeris engizý kerek. Naqty osy sharýany qolǵa almaqpyz. Máselen, maiqan balyǵyn satýǵa tyiym salynady», - dedi Ekologiia, geologiia jáne tabiǵi resýrstar ministri Maǵzum Myrzaǵaliev vedomstvonyń alqa otyrysynan keiin tilshilerge bergen jaýabynda.
Ol sonymen qatar, ministrlik ózge de baqylaýshy organdarmen maiqandy satý úshin aýlanýyna jol bermeý kerektigin atap ótti.
«Sýquzǵyn boiynsha aitarym, Marqakólde atalmysh qustyń sanyn retteý úshin eki sharýany qolǵa alý kerek. Birinshiden, zańnamaǵa ózgeris engizip, ol qustardyń sanyn rettep otyrý múmkindigin qarastyrǵan jón. Ekinshiden, sýquzǵyndardyń sany biologiialyq negizdemege sai rettelip otyrýy tiis», - dedi ol.
Qazirgi ýaqytta Marqakólde sýquzǵyndardyń sany edáýir artyp ketken.
«Zańnamaǵa tiisti ózgeristerdi engizemiz. Sonymen qatar, biologiialyq negizdeme boiynsha jumys ta júrip jatyr. Marqakólde qazirgi tańda naqty qansha sýquzǵyn baryn anyqtap alýymyz kerek. Osyny eskere kele sýquzǵynnyń sany azaiyp ketpeitindei jáne balyqqa da zor shyǵyn kelmeitindei sharýanyń retin tabýǵa tiispiz», - dedi ministr.
Eske sala ketsek, osy jyldyń shilde aiynda QR Prezidenti Qasym-Jomart Toqaev Shyǵys Qazaqstan oblysynyń Marqakól kólinde zańsyz balyq aýlap júrgen qylmystyq toppen kúresýdi tapsyrǵan bolatyn.
Keiin Ishki ister ministrligi arnaiy operatsiia barysynda Marqakólde zańsyz balyq aýlap kelgen qylmystyq top ustalǵanyn habarlady.
