Sáken Maiǵaziev sońǵy posttarynyń birinde: «Keide, arzan ataqtyń artyn jalaǵan arsyzdar men «haiptyń» quly bolǵan qarańǵylar, qazaqtyń túbine jetedi-aý» – dep instagram-paraqshasynda jazba qaldyrǵan bolatyn. «Mýzart» tobynyń múshesi bul synnyń kimderge baǵyttalǵanyn ashyp aitty.
Ánshi áńgimeniń álqissasyn atyshýly «Qalaýlym» jobasyn basqaratyn jýrnalist Shahkerim Kármennen bastady.
«Solardyń biri – Shahkerim. Asyldyń synyǵy, sondai keremet azamat Jánibek Kármenovtei qazaqtyń tulǵasynyń, qazaqtyń óner maitalmanynyń uly sondai tirlik jasap júrse, qazaqtyń tilin olai nasihattamai qoisyn. Qyzǵyzdar kóredi, ózbekter kóredi deidi. Olai mazaq qylyp kórmei-aq qoisyn bizdi. Men solai aitqan bolar edim», – deidi Sáken Maiǵaziev.
Sondai-aq, óner iesi Baian Alagózovaǵa anaiy suraqtar qoiyp, tanymal prodiýserdi tyǵyraqqa tiregen Aman Tasyǵanǵa da ókpesi qara qazandai ekenin jetkizdi. Tipti, jýrnalistke arnaiy qońyraý shalyp, mundai taqyryptaǵy suhbattardy toqtatýyn talap etken.
«Men barlyǵyna qońyraý shaldym. Men tek áleýmettik jeli arqyly ǵana emes, tikelei ózderine de habarlasyp aityp júrmin. Ne degen beibastyq, qoisańdarshy, qysqartsańdarshy dep. «Sizder túsinbeisizder degenge saiady. Onda turǵan ne bar? Qazirgi zamannyń talaby sol» – deidi. Onda zamannyń talaby sol bolsa, qul bolyp keteiik. Ol degen sanasyzdyq. Ónerdegi júrgen áriptesterime de aitqym keledi. Erteń ul ósiresińder, qyz ósiresińder. «Oi, Sáken aǵa da aqyldy bolyp…» demeńizder. Kóringen taýdyń alystyǵy joq. Erteń nemere kóresizder. Solardyń barlyǵy sol istegen nárseni qaitalap jatsa, barlyq obaly ózderińizderge tietinin umytpańyzdar», – deidi «Mýzart» tobynyń ánshisi.
Maiǵazievtiń aitýynsha, Shahkerim Kármen jetekshilik etetin «Qalaýlym» baǵdarlamasy men Aman Tasyǵannyń «Talk like» jobasy qoǵamnyń buzylýyna zor áserin tigizip jatyr.
«Baiaǵyda Toqtar Serikov: «Kez-kelgen adam oramal taǵyp turǵan qyzdan góri, jartylai jalańash qyzǵa kózi jalt ete qalatyny zańdylyq» – dep aityp edi. Nápsi degen bolady. Bizdi azǵyryp jatyr da. Shaitanǵa ásker bolsaq, bizdiń qurdymǵa ketkenimiz. Men sútten aq, sýdan taza, pákpin dep turǵan joqpyn. Biraq sony sanaly túrde bilip turyp, qazaqsha jaman sóz bar endi «sýǵa syndyrý» nemese «sýǵa búldirý» degen. Óz basym osyny baryp turǵan úlken nadandyq dep oilaimyn», – deidi Maiǵaziev.
Sáken Maiǵaziv bul suhbaty arqyly haiptyń jeteginde ketken jigitterge sońǵy eskertýin jasady.
«Baýyrlaryma aitqym keledi taǵy da. Biz siiaqty namysty azamattardy, qol jumsaýǵa deiin májbúrlemeńizdershi, ótinish. Bir kúni bolmasa, bir kúni namysty azamattar jarylady. Jaqtaryńyz synyp, aiaqtaryńyz máiip bolyp júrmesin. Taǵy eskertemin. Árine barlyǵy zańmen qorǵalǵan. Biraq men babamnyń árýaǵy úshin, Allanyń razylyǵy úshin ondai qadamǵa barýǵa daiynmyn. Abai bolyńdar jigitter! Haip dep júrip, haipqa qul bolyp ketip júrmeńder», - deidi Sáken.
Derekkóz: Stan.kz
