Ulttyq Bank tóraǵasy Erbolat Dosaev Úkimettiń keńeitilgen otyrysynda valiýta naryǵyndaǵy ahýalǵa toqtaldy, dep habarlaidy "Ult aqparat".
Ulttyq bank tóraǵasynyń aitýynsha, búkil álemde ekonomikalyq ósimniń keiinge shegerýli saldarynan qazir serpilister bolyp jatyr. Bul óz kezeginde Qazaqstannyń makroekonomikasynda shetel valiýtasyna degen suranysty arttyryp, teńgege birshama qysym túsirip otyr. Degenmen, maýsym aiynda munai baǵasynyń nyǵaiýy teńgeniń baǵamyna da oń áser etken.
«Birinshi jartyjyldyqta valiýta naryǵy syrtqy naryqtardyń qubylmalylyǵyna qaramastan aitarlyqtai turaqty boldy. Maýsym aiynyń qorytyndysy boiynsha munai baǵasynyń 8,4%-ǵa ósýi teńge baǵamyn 0,9%-ǵa nemese 425 teńgege deiin nyǵatty», - dedi Ulttyq bank basshysy.
Erbolat Dosaevtyń aitýynsha, importqa degen suranys teńge baǵamyna qysym kórsetýin jalǵastyra bermek.
«Ekinshi toqsannan bastap iskerlik belsendilikti qalpyna keltirý, importqa keiinge qaldyrylǵan suranysty iske asyrý jáne sheteldik investordyń dividendtik tólemderi esebinen suranystyń artýy baiqalady. Atalǵan faktorlardy eskersek, shetel valiýtasyna ósip kele jatqan suranys pen AQSh dollarynyń biyldyń ózinde 2,8 paiyzǵa jahandyq nyǵaiýy teńgege eleýli qysym kórsetýin jalǵastyryp otyr» - dedi Ulttyq bank tóraǵasy.
