Búgin Aqmola oblysynyń Zerendi aýdanynda el jastarymen kezdesken «Nur Otan» partiiasy Tóraǵasynyń Birinshi orynbasary osylai dedi.
«Zeren» jazǵy bilim berý lagerinde ótken is-sharaǵa elimizdiń ár túkpirinen kelgen belsendi jastar qatysty. Kezdesýde Máýlen Áshimbaev partiia jumysyndaǵy ózgerister men ondaǵy jastardyń róli týraly aityp berdi. Atap aitqanda, ol partiianyń «Tsifrly Qazaqstan», «Rýhani jańǵyrý» baǵdarlamalarynyń júzege asyrylýyna úles qosýǵa, halyqtyń tsifrlyq saýattylyǵyn arttyrýǵa jáne kásipkerlikti qoldaýǵa baǵyttalǵan birqatar naqty jobalardy qolǵa alǵanyna erekshe toqtaldy.
Sonymen qatar Máýlen Áshimbaev qazir aqparat zamany ekenin aityp, osyndai kezeńde Elbasy anyqtap bergen mindetterdi júzege asyryp, maqsatqa qol jetkizý jolynda jastardyń boiynan qandai qasietter kórgisi keletinine nazar aýdardy.
– Birinshiden, ár adam ózin ózi únemi jetildirip, damytyp, izdenýi tiis. Kásibi, ziiatkerlik jáne bilim deńgeiin arttyrýǵa erekshe kóńil bólýleri kerek. Kitap oqýdy igi dástúrge ainaldyrýy qajet. Bul rette oqityn kitaptardy durys tańdaý kerektigin de eskergenimiz jón. Ekinshiden, sananyń ashyqtyǵyn qalyptastyrýymyz kerek. Elbasy da «Rýhani jańǵyrý» baǵdarlamasynda osy máseleni kótergeni belgili. Iaǵni jastar birjaqty bolmai, kez kelgen máselege qatysty basqa da balama pikirlerdi eskerip, dúnietanym aiasyn udaiy keńeitip otyrýy tiis. Úshinshiden, jastar aldaryna naqty maqsattar qoiyp, durys armandai bilýleri tiis. Óitkeni jastarynyń armany asqaq, maqsaty aiqyn bolmasa, ondai eldiń bolashaǵy bulyńǵyr. Sondyqtan, jastar aldaryna strategiialyq maqsattar qoiyp, soǵan jetý jolynda bar kúsh-jigerin jumsaýy kerek, – dedi «Nur Otan» partiiasy Tóraǵasynyń Birinshi orynbasary.
Sonymen qatar Máýlen Áshimbaev óziniń qalyptasýyna septigin tigizgen birqatar kitaptardy atap ótti.
– Búginde qarqyndy júzege asyrylyp jatqan «Rýhani jańǵyrý» baǵdarlamasynyń mánin qysqasha túsindirer bolsaq, ol degenimiz – ulttyq kodty saqtai otyryp, álemniń eń úzdik tájiribelerin meńgerý degen sóz. Sondyqtan kitap oqý mádenietinde Muhtar Áýezovtyń «Abai joly» romanyn oqýymyz kerek. Abaidyń filosofiiasyn sińirý arqyly biz ózimizdiń ulttyq bolmysymyzdy tanimyz. Al kórkem ádebiette álemge áigili jazýshy Ernest Hemingýeidiń «Shal men teńiz» atty shyǵarmasyn oqýǵa keńes beremin. Sondai-aq kitap oqýda kásibi eńbekterdi de nazardan tys qaldyrmaýymyz kerek. Bul rette belgili amerikalyq saiasattanýshy Farid Zakariianyń «The Future of Freedom» dep atalatyn eńbegin oqýǵa keńes beremin. Budan basqa da kóptegen qyzyqty kitaptar bar. Sondyqtan kitap oqýdy árqaisysyńyz igi dástúrge ainaldyrýlaryńyz kerek, – dedi Máýlen Áshimbaev.
Is-shara sońynda jastar ózderin tolǵandyrǵan saýaldaryn joldap, túrli usynystaryn bildirdi.
