QR Parlamenti Senatynyń tóraǵasy Máýlen Áshimbaev ustazdar qaýymyn kásibi merekelerimen quttyqtady, dep habarlaidy "Ult aqparat".
«Elimizdegi barsha ustazdar qaýymyn búgingi kásibi merekelerimen quttyqtaimyn! «Ustazdyq etý – uly qyzmet» degen qanatty sóz bar. Shyn máninde, áli oń-solyn tolyq tanyp úlgermegen balanyń ómirden óz ornyn taýyp, adam bolyp qalyptasýynda muǵalimniń eńbegi zor. Sondyqtan ustazǵa qurmet kórsetý – árqaisymyzdyń azamattyq paryzymyz. Búgingidei kúrdeli kezeńde muǵalimderimizge de az salmaq túsip otyrǵan joq. Soǵan qaramastan jastarymyzdyń sapaly bilim alýyna bar kúsh-jigerin jumsap júrgen ardaqty jandarǵa alǵysymyz sheksiz. Ustazdarymyz osyndai syn saǵatta esh moiymai, ult bolashaǵyn bárinen biik qoiyp, óz kásibine degen adaldyqtyń ozyq úlgisin kórsetip keledi», - dedi Senat tóraǵasy.
Sonymen qatar ol qazirgi tańda memleket tarapynan muǵalimder úshin barlyq jaǵdai jasalyp jatqanyn atap ótedi.
«Oǵan «Pedagog mártebesi týraly» zańnyń qabyldanýy aiqyn dálel. Prezidentimizdiń biylǵy Joldaýynda da bilim berý isi el damýynyń eń negizgi basymdyqtarynyń biri ekeni aityldy. Sonyń aiasynda muǵalimderdiń jalaqysyn kóterý, bolashaq pedagogterdiń stipendiiasyn kóbeitý siiaqty mańyzdy mindetter júzege asyrylyp jatyr. Osyndai igi bastamalar aldaǵy ýaqytta da jalǵasa beretini anyq. Barsha ustazdarymyzdy kásibi merekelerimen quttyqtai otyryp, jumystaryna tolaiym tabys, shańyraqtaryna shattyq tileimin. Jetistigimen qýantar shákirtterińiz kóp bolsyn!», - dedi Máýlen Áshimbaev.
Aita ketsek, qazan aiynyń alǵashqy jeksenbisinde Qazaqstanda muǵalimderdiń kásibi merekesi atap ótiledi.
Bul ataýly kún 1965 jyly 29 qyrkúiekte KSRO Joǵarǵy Keńesi Prezidiýmynyń Buiryǵymen belgilengen. Búgingi tańda Qazaqstan, Belarýs, Latviia jáne Ýkraina Muǵalimder kúnin qazannyń alǵashqy jeksenbisinde atap ótedi. Al kórshiles Ózbekstan – 1 qazanda, Qyrǵyzstan, Ázerbaijan, Resei, Tájikstan, Armeniia, Moldaviia, Estoniia jáne Litva – ustazdar merekesin 5 qazan kúnine bekitken.
