Senat tóraǵasy Máýlen Áshimbaev Palatanyń ótken sessiiadaǵy jumysyn qorytyndylady, dep habarlaidy "Ult aqparat".
Máýlen Áshimbaevtyń aitýynsha, ótken sessiiada Parlament el igiligine qyzmet etetin birqatar mańyzdy zań qabyldady.
«Bul kezeń elimiz úshin ońai bolǵan joq. Búkil álemmen birge biz de jańa syn-qaterlermen betpe-bet keldik. Osyndai sátte Prezidentimizdiń basshylyǵymen el ekonomikasyn qalpyna keltirýge, halyqtyń ál-aýqatyn túzetýge baǵyttalǵan keshendi sharalar júzege asyrylýda. Sol bastamalardy jáne elimizdiń strategiialyq saiasatyn zańnamalyq turǵydan qamtamasyz etýge Qazaqstan Respýblikasynyń Senaty da óziniń somdy úlesin qosty», – dep atap ótti Senat tóraǵasy.
M. Áshimbaev Memleket basshysy alǵa qoiǵan mindetterdi iske asyrýdaǵy nátijeli jumysy úshin depýtattarǵa alǵysyn bildirdi.
Senat baspasóz qyzmetiniń málimetinshe, Senattyń jalpy otyrysynda QR Prezidentiniń usynymy boiynsha N.M.Rahmetýllina men A.S.Tókiev Joǵarǵy Sottyń sýdiasy qyzmetine sailandy. Jańadan sailanǵan sýdialar ant berdi.
Odan bólek, Palata «Salyq jáne biýdjetke tólenetin basqa da mindetti tólemder týraly» QR Kodeksine (Salyq kodeksi) jáne «Salyq jáne biýdjetke tólenetin basqa da mindetti tólemder týraly» Kodeksin (Salyq kodeksi) qoldanysqa engizý týraly» Zańyna ózgerister men tolyqtyrýlar engizý týraly» Zańdy qabyldady. Bul zań budan bylai ekonomikalyq ósýdi qalpyna keltirýge yqpal etetin bolady. Túzetýler memlekettiń kásipkerlik sýbektilerine jáne halyqqa qoldaý kórsetýine múmkindik beredi, bul azamattardyń iskerlik belsendiligi men ál-aýqatyna oń áser etedi.
Senat depýtattary «Qazaqstan Respýblikasynyń keibir zańnamalyq aktilerine shetel valiýtasyndaǵy ipotekalyq qaryzdar, kórsetiletin tólem qyzmetteri naryǵynyń sýbektilerin retteýdi jetildirý, jalpyǵa birdei deklaratsiialaý jáne ekonomikalyq ósýdi qalpyna keltirý máseleleri boiynsha ózgerister men tolyqtyrýlar engizý týraly» Zańdy da qabyldady. Ózgerister 2016 jylǵy 1 qańtarǵa deiin berilgen shetel valiýtasyndaǵy ipotekalyq qaryzdardy konvertatsiialaý jumystaryn aiaqtaýǵa múmkindik beredi. Sondai-aq, bul qujat aqshany jylystatý qaýpin azaitý, kóleńkeli ekonomikaǵa qarsy is-qimyl maqsatynda tólem júielerimen qosa banktik emes uiymdardyń qyzmetine qatysty máselelerdi tiimdi retteidi.
Sessiianyń qorytyndy otyrysynda senatorlar «Qazaqstan Respýblikasynyń keibir zańnamalyq aktilerine aýditorlyq qyzmet máseleleri boiynsha ózgerister men tolyqtyrýlar engizý týraly» Zańdy da qabyldady. Zań halyqaralyq tájiribelerdi eskere otyryp osy saladaǵy zańnamany odan ári jetildirý, sapany baqylaý jáne aýditorlarǵa attestattaý júrgizý jónindegi ashyq talaptardy belgileý arqyly sapany arttyrý maqsatynda ázirlengen bolatyn.
Senatta «Qazaqstan Respýblikasynyń keibir zańnamalyq aktilerine memlekettik qyzmet máseleleri boiynsha ózgerister men tolyqtyrýlar engizý týraly» Zań da bekitildi. Qujat birqatar eleýli ózgeristerdi, onyń ishinde «Diplommen aýylǵa» baǵdarlamasyn qoldaný aiasyn keńinen taratýdy, konkýrstyq úderisterdi ońtailandyrýdy kózdeidi.
Depýtattar «Qazaqstan Respýblikasynyń keibir zańnamalyq aktilerine aýyldyq eldi mekenderde Internettiń qoljetimdiligin qamtamasyz etý máseleleri boiynsha ózgerister men tolyqtyrýlar engizý týraly» Zańdy da qabyldady. Qujat antenna-dińgek qurylystary nemese uialy jáne spýtniktik bailanys jabdyqtary úshin tirek salýǵa jer ýchaskelerin berýdiń ońailatylǵan tártibin qarastyrady. Ol operatorlar qyzmetiniń tiimdiligin arttyrady jáne aýyldyq jerlerde jyldam internetti paidalanýǵa múmkindik beredi.
Sonymen qatar, otyrysta Senat «Qazaqstan Respýblikasynyń keibir zańnamalyq aktilerine oiyn biznesi máseleleri boiynsha ózgerister men tolyqtyrýlar engizý týraly» Zańdy qabyldady. Bul zań boiynsha býkmekerlik keńseler men totalizatorlardyń qyzmetin baqylaý tetikteri jetildiriletin bolady.
Depýtattar búgin «Qazaqstan Respýblikasynyń keibir zańnamalyq aktilerine sybailas jemqorlyqqa qarsy is-qimyl máseleleri boiynsha ózgerister men tolyqtyrýlar engizý týraly» zań jobasyn birinshi oqylymda maquldady. Qujat sybailas jemqorlyq kórinisteriniń aldyn alý boiynsha qosymsha sharalar engizýdi kózdeidi.
