Parlament májilisiniń depýtaty, májilistiń halyqaralyq ister, qorǵanys jáne qaýipsizdik komitetiniń tóraǵasy Máýlen Áshimbaev beisenbide Astanada islamdaǵy salafilik aǵymnyń Qazaqstanǵa "jat baǵyt" ekenin málimdedi, dep habarlaidy Azattyq.
"Jastarǵa salafiliktiń bizdiń jolymyz emesin, ata-babalarymyzdyń joly bolmaǵanyn jáne ekstremister, radikaldar nasihattaityn ideialardyń bizdiń ulttyq kodymyzǵa sáikespeitinin uqtyrýymyz kerek", - dedi Áshimbaev Astanada ótip jatqan dintanýshylardyń jetinshi forýmynda.
Ol biyl jeltoqsanda Qazaqstan parlamentine dini qyzmet jáne dini birlestikter máseleleri týraly zańǵa ózgerister men túzetýler engizý jónindegi zań jobasy túsetinin aitty. Jobada bilik "balalardy ata-anasynyń ruqsatynsyz dini is-áreketke aralastyrýdyń jaýapkershiligin" rettep, jazasyn kúsheitkisi keledi. Áshimbaevtiń sózinshe, qazaqstandyqtardyń "shetelde kúdikti dini uiymdarda" bilim alýy máselesine jiti baqylaý jasaý kerek. Ol mundai oqý oryndaryn bitirgender elge "álde bir ekstremistik, radikaldyq ideologiiany sińirip qaitatynyn" aitady.
"Shyn máninde, Qazaqstandaǵy salafilik jáne basqa da radikaldyq uiymdar ishki sebepten paida bolǵan joq. Olar bizge syrttan radikaldyq ideiany tańǵysy kelgeni sebebinen paida bolǵan. Bul uiymdar Qazaqstannyń destrýktivti is-qimyldardyń belsendi bolǵanyn qalaidy" dedi Máýlen Áshimbaev.
Onyń pikirinshe, Qazaqstan búkil islam áleminde sózin tyńdaityn, halyqaralyq deńgeidegi óziniń 25-30 teologyn daiyndaýy kerek, bul úshin olar "memleketshil jáne óz eliniń patrioty bolýy tiis".
Forýmǵa qatysyp jatqan din isteri jáne azamattyq qoǵam ministri Nurlan Ermekbaev kóp nárse dini normalardy túsindirýge bailanysty ekenin, kópshiligi muny ár qily túsinetindikten radikalizm paida bolatynyn aitty. Ermekbaev Qazaqstannyń "óz tarihy, mádenieti, mentaliteti bar, kópultty memleket ekenin" aityp, osynyń barlyǵyn eskere otyryp "islamnyń bazalyq erejelerin emes, islam erejelerin túsindirýdiń ózindik modelin" jasaý keregin málimdedi. Onyń sózinshe, osy sebepti islamtanýdyń qazaqstandyq mektebin qalyptastyrý kerek.
