Qazaqstan Parlamenti Senatynyń Tóraǵasy Máýlen Áshimbaev Vatikanǵa jumys sapary aiasynda Rim Papasy Frantsiskpen kezdesti, dep habarlaidy "Ult aqparat" joǵary palatanyń baspasóz qyzmetine silteme jasap.
Kezdesý barysynda Máýlen Áshimbaev Pontifikke Qazaqstan Prezidenti Qasym-Jomart Toqaevtyń atynan Álemdik jáne dástúrli dinder liderleriniń VII Sezine shaqyrý hatyn tabys etti.
Suhbat kezinde Senat Spikeri Qazaqstannyń konfessiiaaralyq kelisimdi nyǵaitýǵa jáne jahandyq dinaralyq dialogty ilgeriletýge baǵyttalǵan bastamalary týraly aityp, olardyń Vatikannyń qyzmetimen tyǵyz bailanysty ekenine nazar aýdardy.
«Etnosaralyq beibitshilik jáne kelisim, ár azamattyń dini kózqarasyna degen qurmet qazaqstandyq mádeniet pen mentalitettiń ajyramas bólshegi. Biz toleranttylyqty saqtaýǵa jáne ony dáripteýge basa mán berip kelemiz. Sol sebepti, bizdiń Tuńǵysh Prezidentimiz Nursultan Nazarbaev 2003 jyly Álemdik jáne dástúrli dinder liderleriniń Sezin shaqyrý týraly bastama kóterdi. Bul Forýmnyń jumysyn damytýǵa Sezd Hatshylyǵynyń Basshysy retinde Memleket basshysy Qasym-Jomart Toqaev aitarlyqtai úles qosty», – dedi Máýlen Áshimbaev.
Sondai-aq, ol Vatikannyń elimizdiń atalǵan bastamasyna qoldaý kórsetip kele jatqany úshin alǵys bildirdi.
«Qazaqstan uiytqy bolǵan dinaralyq forým 18 jyldyń ishinde mazmundy dialog quratyn ashyq alańǵa ainaldy. Osy múmkindikti paidalana otyryp, Qazaqstannyń bastamasyna qoldaý kórsetip kele jatqany úshin Qasietti Taqqa alǵysymdy bildiremin. Buǵan deiin Álemdik jáne dástúrli dinder liderleriniń alty Sezi ótkizildi. Sonyń bárine Katolik shirkeýiniń joǵary laýazymdy ókilderi belsendi túrde qatysyp keledi», – dedi Senat Tóraǵasy.
Aldaǵy Sezde pandemiiadan keiingi kezeńde adamzattyń rýhani-áleýmettik damýyndaǵy álemdik jáne dástúrli dinder liderleriniń rólin talqylaý josparlanyp otyr. Osyǵan orai taraptar din qairatkerleri pandemiiamen jáne onyń áleýmettik-ekonomikalyq jáne gýmanitarlyq saldarymen kúreske úlken úles qosa alatynyna senim bildirdi.
«Pandemiiadan sabaq alýǵa, onyń saldarymen kúreske din liderleriniń qosar úlesi mol. Búkil álemdi sharpyǵan indet adamzattyń qordalanǵan problemalaryn odan ári ýshyqtyryp jiberdi. Olardyń qatarynda kedeishilik, teńsizdik, kóptegen eldegi densaýlyq saqtaý júiesiniń múshkil jaǵdaiy, adamdardyń bilim deńgeiiniń tómendigi, ekologiia jáne taǵy basqa ózekti máseleler bar. Sondai-aq pandemiiadan keiingi kezeńde tutynýshylyq basymdyqtar qaita qaralyp, rýhani jáne adamgershilik qundylyqtar birinshi orynǵa shyǵýǵa tiis», – dedi Máýlen Áshimbaev.
Rim Papasy Frantsisk Qazaqstan Prezidenti Qasym-Jomart Toqaevqa kelesi jyly qyrkúiekte ótetin Álemdik jáne dástúrli dinder liderleriniń VII Sezine qatysýǵa Qazaqstanǵa shaqyrǵany úshin alǵysyn bildirdi. Sondai-aq Pontifik Elbasynyń Sezdi shaqyrý týraly bastamasynyń mańyzdy ekenine nazar aýdaryp, Qazaq eliniń jahandyq dinaralyq dialogty damytýǵa aitarlyqtai ról qosyp otyrǵanyn atap ótti.
Suhbattasýshylar halyqaralyq kún tártibindegi mańyzdy máselelerdi de talqylady. Atap aitqanda, Aýǵanstandaǵy jaǵdaiǵa, jahandyq klimattyń ózgerýine jáne taǵy basqa túitkilderge nazar aýdardy.
Budan basqa, Máýlen Áshimbaev búgin Vatikannyń Memlekettik hatshysy Petro Parolinmen kezdesip, Qazaqstan men Vatikan arasyndaǵy yntymaqtastyq máselelerin sóz etti.
Sonymen birge Qazaqstan Senatynyń Tóraǵasy sapar aiasynda Papa keńesiniń dinaralyq dialog jónindegi prezidenti kardinal Migel Anhel Aiýso Giksotpen kezdesti.
