Foto:Senet Baspasóz qyzmetiMemleket basshysy Qasym-Jomart Toqaevtyń tapsyrmasy boiynsha Parlament Senatynyń Tóraǵasy Máýlen Áshimbaev Resei Federatsiiasynyń Qazaqstan Respýblikasyndaǵy Elshiligine bardy, dep habarlaidy "Ult Aqparat" BAQ.KZ-ke silteme jasap.
Palata Spikeri Máskeý oblysynda bolǵan lańkestik oqiǵaǵa bailanysty elimizdegi Resei Elshisine kóńil aitty. Sondai-aq kóńil aitý kitabyna jazba qaldyryp, gúl shoǵyn qoidy. Ol ondaǵan jazyqsyz jannyń ómirin qiǵan qaiǵyly oqiǵany qazaqstandyqtar aýyr kúizelispen qabyldaǵanyn atap ótti.
Senat Tóraǵasy Resei Federatsiiasynyń Qazaqstan Respýblikasyndaǵy Tótenshe jáne Ókiletti Elshisi Aleksei Borodavkinmen suhbat barysynda Qazaqstan Prezidenti Qasym-Jomart Toqaev beibit azamattarǵa qarsy terroristik aktini qatań aiyptaǵanyn jáne lańkestikke qarsy kúreste Reseimen birge ekenin rastaǵanyn aitty.
Qazaqstan Prezidenti Qasym-Jomart Kemeluly Toqaev BUU-ǵa múshe memleketterdi jazyqsyz azamattarǵa qarsy zorlyq-zombylyqtyń bul túrine biraýyzdan qarsylyq tanytýǵa shaqyrdy. Adamdyqqa jat mundai lańkestik áreketti múlde aqtaýǵa bolmaidy. Qaiǵyly oqiǵaǵa bailanysty Qazaqstan Respýblikasy Parlamenti Senaty depýtattarynyń jáne jeke óz atymnan kóńil aitamyn. Bul jaǵdai Resei halqymen birge bizdiń azamattarymyzdyń da qabyrǵasyn qaiystyrdy. Oryn alǵan lańkestikti biz aýyr kúizelispen qabyldadyq. Barlyq zardap shekkenderge sabyr tilei otyryp, olardyń tezirek saýyǵyp ketýine tilektestigimizdi bildiremiz, – dedi Máýlen Áshimbaev kóńil aitý kitabyna qaldyrǵan jazbasynda.
Aita keteiik, Memleket basshysy Qasym-Jomart Toqaev Resei Prezidentimen telefon arqyly sóilesip, Máskeý oblysyndaǵy lańkestik áreket saldarynan kóptegen adamnyń qaza tabýyna bailanysty qazaqstandyqtardyń atynan Vladimir Pýtinge jáne baýyrlas Resei halqyna qaiǵyryp kóńil aitty. Óz kezeginde Resei Prezidenti qoldaý kórsetkeni úshin Qasym-Jomart Toqaevqa alǵys bildirdi.
Sonymen qatar Memleket basshysynyń tóraǵalyǵymen Qazaqstan Respýblikasy Qaýipsizdik Keńesiniń shuǵyl otyrysy ótti. Jiynda quqyq qorǵaý qurylymdary men jergilikti atqarýshy organdardyń jumys jospary, sondai-aq ekstremaldy jaǵdailardaǵy olardyń qyzmetin úilestirý máseleleri qarastyryldy. Prezident el azamattarynyń qaýipsizdigin jáne terrorizmge qarsy kúres maqsatynda Qazaqstannyń basqa memlekettermen jáne halyqaralyq uiymdarmen yqpaldastyǵyn qamtamasyz etýge baǵyttalǵan birqatar tapsyrma berdi.
