Qazaqstan Respýblikasy Parlamenti Senatynyń Tóraǵasy Máýlen Áshimbaev Ózbekstanǵa resmi sapary aiasynda osy eldiń Olii Májilisi zań shyǵarý palatasynyń spikeri Nýrdinjon Ismoilovpen kezdesti, dep habarlaidy "Ult aqparat" joǵary palatanyń baspasóz qyzmetine silteme jasap.
Kezdesý barysynda taraptar mádeni-gýmanitarlyq yntymaqtastyqty arttyrýǵa Parlament depýtattarynyń yqpalyn jáne týrizm, tsifrlyq tehnologiia salalarynda birlesip áreket etý máselelerin talqylady. Sondai-aq, depýtattardyń nazaryn qajet etetin ózekti problemalar da kóterildi. Sondai túitkilderdiń biri transshekaralyq sý resýrstaryn paidalaný máselesi.
«Qazirgi tańda transshekaralyq sý resýrstaryn paidalaný máselesinde belsendi yntymaqtastyq ornady. Sý qatynastary salasyndaǵy yntymaqtastyq máseleleri jónindegi Jol kartasy iske asyrylyp jatyr. Bul baǵyttaǵy ózara bailanysta Transshekaralyq sý nysandaryn birlesip basqarý, qoldaný jáne saqtaý týraly kelisimdi kelisý jumystaryn aiaqtaýdyń mańyzy zor», – dedi Máýlen Áshimbaev.
Palata spikerleri halyqaralyq arenadaǵy parlamentaralyq yntymaqtastyq máselelerin de sóz etti.
«Biz úshin halyqaralyq uiymdarda bir-birimizdi qoldap, kelisip áreket etý máselesi de mańyzdy. EQYU, PAO jáne basqa da alańdar aiasynda osyndai qaǵidany qoldanýdyń áseri mol dep esepteimiz», – dedi Qazaqstan Senatynyń Tóraǵasy.
Is-shara sońynda suhbattasýshylar qos memlekettiń barlyq saladaǵy senimdi jáne belsendi dialogy aldaǵy ýaqytta da ekijaqty qatynastardyń dáiekti damýyna serpin beretinin atap ótti.
Sonymen qatar búgin Máýlen Áshimbaev Tashkent qalasyndaǵy «Tehnopark» ónerkásiptik kásiporyndar tobynyń qyzmetimen tanysty. Bul jerde ónerkásiptik ónimder shyǵaratyn ondaǵan kompaniia jumys isteidi.
Odan bólek, Senat Tóraǵasy sapar aiasynda Tóle bi kesenesine jáne «Haziret Imom» keshenine bardy.
