Senat tóraǵasy Máýlen Áshimbaev «Habar 24» telearnasyna bergen suhbatynda pandemiiamen kúres kezeńinde memlekettik basqarý júiesinde qandai máseleler bar ekeni belgili bolǵanyn aitty, dep habarlaidy "Ult aqparat".
Sondai-aq, Senat Tóraǵasy barlyq memlekettik apparat úshin karantin naǵyz syn saǵaty bolǵanyn jetkizip, osy jaitqa erekshe nazar aýdardy. Shyn máninde, bul kezeńde memlekettik organdardyń tiimdiligine qatysty kóptegen problemalar týyndaǵany belgili. Suhbat barysynda Máýlen Áshimbaev keibir sheshimderdiń der kezinde qabyldanbaýyna, jekelegen memlekettik organdar men vedomstvo qyzmetkerleri kóp jaǵdaida bir-biriniń qyzmetin qaitalaitynyna, kóptegen úderisterdiń eskirgenine jáne olardy tsifrlyq formatqa aýystyratyn kez kelgenine toqtalyp ótti.
«Memlekettik apparatty ońtailandyrý kerek. Júieni qaita jańǵyrtyp, bul baǵytta jańa, zamanaýi tehnologiiany qoldaný qajet. Halyqqa jedel qyzmet kórsetýge, der kezinde sheshim qabyldaýǵa jáne aqparatty jetkizýge múmkindik beretin tsifrlandyrý jumystaryn júieli túrde júrgizgen jón. Batysta keńinen qoldanylyp, óziniń tiimdiligin dáleldegen jobalyq menedjment tásilin bizdiń memlekettik basqarý júiesine engizý kerek. Mysaly, Ulybritaniiada Úkimet jobalyq menedjment júiesin keń aýqymda jáne maqsatqa sai qoldanady», – dedi Senat Tóraǵasy.
Sonymen qatar Máýlen Áshimbaev memlekettik qyzmetshilerdiń kadrlyq áleýetin arttyrý, jumysqa bolashaǵynan úmit kúttiretin, belsendi, bastamashyl mamandardy jumyldyrý qajet ekenine toqtalyp ótti.
Suhbat kezinde Memleket basshysy Qasym-Jomart Kemeluly Toqaevtyń jańa Joldaýynda aitylǵan aýyl ákimderin sailaý máselesine qatysty da suraq qoiyldy.
«Ákimderdi sailaý memlekettik qyzmetke bastamashyl, belsendi azamattardy tartý úshin qolǵa alynǵan tiimdi tetikterdi biri ekeni sózsiz. Bul ákimshilik-aýmaqtyq birlikke basshylyq etetin adamdy aýyl turǵyndarynyń ózderi tańdaýyna múmkindik beredi. Atalǵan úrdis kelesi jyldan bastalatyn shyǵar. Óikeni, Prezidentimiz Joldaýda aldaǵy jyly birqatar ákimniń merzimi aiaqtalatynyn atap ótti», – dedi Máýlen Áshimbaev.
Senat Tóraǵasy aýyl ákimdigine óz kandidatýrasyn usynǵysy kelgen azamattarǵa eshqandai kedergi keltirmei, bárine teń múmkindik berýdiń mańyzdy ekenin tilge tiek etti.
«Ákimdikke kandidattarǵa arnalǵan bazalyq sharttardy anyqtaý kerek. Olar: azamattyǵy, bilimi jáne kásibi tájiribesi. Bul belsendi jáne bastamashyl azamattarǵa, onyń ishinde jastarǵa sailaýǵa qatysý arqyly óz qarym-qabiletterin kórsetýge múmkindik beredi. Eger sol okrýgtiń turǵyndary kimdi laiyqty dep tanysa, sony sailaidy. Biz bul baǵyttaǵy zań jobasyn qaraǵan kezde osy aitylǵandardy eskeremiz», – dedi Máýlen Áshimbaev.
