«Nur Otan» partiiasy Tóraǵasynyń birinshi orynbasary Máýlen Áshimbaev Qyzylorda oblysyna jumys sapary barysynda Memleket basshysynyń Joldaýyn talqylaý boiynsha partiia aktivimen kezdesý ótkizip, Qyzylorda qalasy men Syrdariia aýdanynyń áleýmettik nysandarynyń jumysymen tanysty.
«Nur Otan» partiiasy Tóraǵasynyń birinshi orynbasary Máýlen Áshimbaev Syr óńiriniń jetistikteri men qarqyndy damýyn erekshe atap ótti.
«Qyzylorda oblysynyń ejelden beri ózindik dástúr-salty men mádeni qundylyqtary bar ekeni belgili. Búgin de aimaq qarqyndy damyp kele jatqanyn jańa qala qurylysynan, tsifrlandyrý men kásipkerlik boiynsha júrgizilip jatqan jobalardan anyq kórýge bolady. Bul jumystardy Memleket basshysynyń Joldaýyna sáikes naqty tapsyrmalar aiasynda jalǵastyrý kerek. Al partiianyń mindeti keń aýqymdy aqparattyq-nasihat jumystaryn júrgize otyryp, iske asyrý joldaryn kórsetip, óńirlerdegi tapsyrmalardyń oryndalýyna baqylaý jasaý bolyp tabylady», - dedi «Nur Otan» partiiasy Tóraǵasynyń birinshi orynbasary.
Óz kezeginde, Qyzylorda oblysynyń ákimi Q.Kósherbaev Elbasy Joldaýy aiasynda adami kapitaldy damytýdyń mańyzdylyǵyn atap ótti.
«Sarapshylardyń baǵalaýy boiynsha, Batys Eýropa elderinde adam kapitalynyń jalpy ishki ónimdi qalyptastyrýǵa qosqan úlesi 30%, AQSh-ta 40%, TMD elderinde ol 10-15%-dy quraidy. Búginde áleýmettik-ekonomikalyq damýdyń sapalyq sipattamalary alǵa shyǵýda. Bul ósimniń arqasynda ekonomikada ilgerileý baiqalady. Jalpy ishki ónim kórsetkishiniń ósýi joǵary tehnologiialyq óndiristerdiń - bilim berý, densaýlyq saqtaý, ǵylym jáne basqa da ziiatkerlik qyzmetter esebinen júrýi tiis. Nátijesinde áleýmettik-ekonomikalyq júieniń tiimdiligi artyp, eń bastysy ómir sapasy jaqsaryp keledi», - dep atap ótti oblys ákimi.
Sondai-aq, aktiv jiynynda Qorqyt ata atyndaǵy Qyzylorda memlekettik ýniversitetiniń rektory Qylyshbai Bisenov bilim berý salasynda júzege asyrylyp jatqan jobalar týraly aitty. Syrboiylyq 500–den astam túlek Máskeý men Sank-Peterbýrgtiń joǵary oqý oryndarynda oqyp jatyr. Aita keteiik, mektep túlekteriniń 97 paiyzy joǵary oqý oryndary men kolledjderde bilip alýda.
Kásipker Aigúl Muhanbetjanova memlekettik qoldaý arqyly júzege asqan óz kásibi jaily aityp berdi.
«Qazirgi tańda kásipkerlerge arnalǵan shaǵyn-orta biznesti damytý úshin barlyq jaǵdai jasalǵan. «Biznestiń jol kartasy» baǵdarlamasy boiynsha nesie alyp, kúieýimmen birge shulyq tsehyn iske qostyq. Táýligine 400 jup shulyq daiyndap, osylaisha jergilikti ónim shyǵarýdamyz»,- deidi kásipker.
Atap óteiik, 2018-2020 jyldardy óńirde jappai kásipkerlikti damytýdyń úsh jyldyǵy dep jariialady. Qazirgi tańda shaǵyn-orta biznesti qarjylandyrý úshin oblystyq biýdjetten 32 mlrd. teńge, startap-jobalarǵa 3 milliardtan astam qarjy bólingen.
Jappai kásipkerlikti damytý oblysta úsh mańyzdy máseleniń sheshim tabýyna: salyq bazasyn jaqsartýǵa, turǵyndardy jumyspen qamtýǵa jáne qoǵamdyq turaqtylyqty qamtamasyz etýge yqpal etetinin aimaq basshysy atap ótti.
«Jas Otan» jastar qanatynyń oblystyq filialynyń tóraǵasy Talǵat Tiles jastardyń bastamalaryna qoldaý kórsetý boiynsha aimaqta atqarylyp jatqan jumystar týraly baiandady. Qazirgi tańda Syrdariianyń sol jaǵalaýynda zamanaýi jastarǵa qyzmet kórsetý ortalyǵy salynyp, jastar úshin barlyq jaǵdai qarastyrylýda.
Oblys ákimdiginiń ǵimaratynda M.Áshimbaev Sitýatsiialyq ortalyqtyń jumysymen tanysyp, Qyzylorda oblysynyń tájiribesin respýblika boiynsha taratý qajettigin aitty.
Jumys saparynda «Nur Otan» partiiasy Tóraǵasynyń birinshi orynbasary Syrdariianyń sol jaǵalaýynan «7-20-25» baǵdarlamasymen salynyp jatqan turǵyn úi qurylysy nysandarymen tanysty. Atap óteiik, Qyzylorda oblysynda «Orda» turǵyn úimen qamtamasyz etýge arnalǵan «Jol kartasy» sheńberinde halyqtyń áleýmettik osal toptaryn qoljetimdi baspanamen qamtý josparlanýda.
Sonymen qatar, M.Áshimbaev sol jaǵalaýdaǵy jaqynda iske qosylǵan «Rýhani jańǵyrý» ortalyǵynda boldy. Eske sala keteiik, Qyzylorda qalasynyń 200 jyldyq mereitoiy aiasynda Syrdariianyń sol jaǵalaýynan paidalanýǵa berilgen alǵashqy nysan – «Rýhani jańǵyrý» ortalyǵy men qalalyq murajai ǵimaratynyń saltanatty ashylý rásimi ótken bolatyn. Bul nysan 1925 jyly ulttyń resmi «qazaq» atalýy týraly tarihi sheshim qabyldanǵan Qazaq Ortalyq Atqarý Komitetiniń syzba-nusqasy negizinde salynǵan.
Aita keteiik, jyl sońyna deiin sol jaǵalaýdan alǵashqy shaǵyn aýdan men birqatar áleýmettik nysandardy paidalanýǵa berý josparlanyp otyr.
Jumys sapary barysynda Máýlen Áshimbaev №3 S.Tolybekov atyndaǵy mektep-litseiiniń jáne Á.Tájibaev atyndaǵy oblystyq ǵylymi ámbebap kitaphanasynda ornalasqan IT–park jumysymen tanysty.
Ári qarai «Kásipkerlikke arnalǵan geoaqparattyq onlain qyzmeti» partiialyq jobasy sheńberindegi kásipkerlerge qyzmet kórsetý ortalyǵyna bardy. Ortalyqta kásipkerlerge «bir tereze» qaǵidaty boiynsha jer máseleleri, sáýlet jáne qurylys, injenerlik jelilerge qosylý, memlekettik kiris máseleleri, qarjy institýttary úshin qarjylandyrý sharttary, bankke deiingi jáne keiingi jobalardy qoldaý boiynsha 40-tan astam qyzmet túri usynylady. Barlyq qyzmetter tegin kórsetiledi. Bul respýblika kóleminde teńdesi joq ortalyq bolyp tabylady.
Baǵdarlama aiasynda M.Áshimbaev Syrdariia aýdanynyń Shaǵan aýylynda ótkizilgen aktiv jiynyna qatysty.
