«Halyqqa kómek» jobasy Aqmola oblysynda erekshe qarqynmen júzege asyrylýda. Osy baǵyttaǵy jáne Elbasy partiia sezinde anyqtap bergen basqa da basymdyqtar boiynsha atqarylyp jatqan jumystarmen tanysý úshin «Nur Otan» partiiasy Tóraǵasynyń birinshi orynbasary Máýlen Áshimbaev atalǵan óńirge arnaiy bardy, dep habarlaidy "Ult aqparat".
Partiianyń Feisbýktegi resmi paraqshasynda jariialanǵan aqparatqa sáikes, sapar barysynda ol partiia oblystyq filialynyń qoǵamdyq qabyldaý bólmesinde bolyp, joba aiasynda qolǵa alynǵan Biryńǵai áleýmettik tereze júiesiniń qyzmetine nazar aýdardy. Atalǵan júieniń iske qosylǵanyna kóp ýaqyt óte qoimasa da elimiz boiynsha oń nátijesin berýde. Sonyń ishinde Aqmola oblysyn erekshe atap ótken jón. Óitkeni óńirde áleýmettik tereze arqyly 431 ótinish kelip túsip, onyń 43 paiyzy dereý oń sheshimin tapqan.
Sondai sheshimderdiń biri Máýlen Áshimbaevtyń qatysýymen sheshildi. Naqty aitqanda, qyzynyń oqý aqysy úshin kómek surai kelgen kóp balaly anaǵa qajetti somada qarjylai qoldaý kórsetildi. Sondai-aq, onyń páter jaldap turatyny eskerilip, baspana máselesi de qaralyp, oblys basshylyǵy tarapynan zań aiasynda tiisti jumystar júrgiziletin boldy.
«Halyqqa kómek» tikelei Elbasynyń tapsyrmasymen qolǵa alynǵan joba. Sondyqtan azamattardyń ótinishterin aiaqsyz qaldyrmai, belsendi jumys isteýimiz kerek. Óitkeni halyqty alańdatqan máselelerdi oń sheship, dereý qyzmet kórsetý - bizdiń basty mindetimiz», - dedi M.Áshimbaev.
Sonymen qatar, ol Kókshetaý qalasyndaǵy Qaqjanovtar otbasyna arnaiy bardy. Bul otbasy tórt bala tárbielep otyr. Ókinishke qarai, olardyń ekeýi sal aýrýyna shaldyqqan. Buǵan deiin otbasy memlekettik baǵdarlamamen jalǵa alǵan eki bólmeli páterleriniń qalǵan somasyn ótep, tolyǵymen satyp alý úshin partiiadan qoldaý suraǵan bolatyn. «Baqytty otbasy» jobasy aiasynda atalǵan másele oń sheshimin tapty.
«Bul bastama da Elbasynyń tikelei baqylaýynda. Óitkeni kóp balaly otbasylarǵa júieli qoldaý kórsetý memleketimizdiń negizgi basymdyǵy bolyp tabylady», - dedi M.Áshimbaev.
.jpeg)