Qazaqstan Prezidenti Nursultan Nazarbaev pen Qyrǵyzstannyń jańa basshysy Sooronbai Jeenbekovtiń kezdesýi eki eldiń qarym-qatynasynda jańa kezeńdi ashyp otyr. Bul týraly Parlament Májilisi Halyqaralyq ister, qorǵanys jáne qaýipsizdik komitetiniń tóraǵasy Máýlen Áshimbaev aityp berdi, dep jazady QazAqparat.
«30 qarashada Minskte Qazaqstan men Qyrǵyzstan Prezidentteriniń kezdesýi, sonymen qatar osy kezdesýdiń qorytyndysy boiynsha eki el úkimetteri tarapynan Jol kartasyna qol qoiylýy Qazaqstan men Qyrǵyzstan bailanystarynda jańa kezeńdi ashyp otyr», - dedi Máýlen Áshimbaev agenttikke bergen suhbatynda.
Onyń paiymynsha, Belarýs astanasynda eki el memleket basshylary arasynda óte tyǵyz talqylaýlar bolyp, onyń nátijesinde jedel túrde Jol kartasyna qol qoiyldy.
«Minskte qol jetkizilgen ýaǵdalystyqtardy, sondai-aq Jol kartasynda eskerilgen basymdyqtardy júzege asyrý eki el arasyndaǵy qarym-qatynastardy nyǵaitýǵa múmkindik beretini anyq», - dedi depýtat.
Máýlen Áshimbaevtyń atap ótýinshe, Jol kartasynda qazirgi máselelerdi sheshýge yqpal etetin óte mańyzdy sharalar qarastyrylǵan. Olar Qyrǵyzstan tarapyna ónimniń sanitarlyq, veterinarlyq, fitosanitarlyq baqylaýyn qamtamasyz etýge bailanysty bolyp otyr. Óitkeni bul taýarlar Qazaqstan aýmaǵyna jáne ary qarai elimiz arqyly EAEO-nyń ózge de elderine tasymaldanady.
«Mundai baqylaýdy kúsheitý boiynsha tiisti sharalar Jol kartasynda eskerilgen, sonymen qatar Qyrǵyzstanda kedendik ári salyqtyq ákimshilendirýdi kúsheitý sharalary qarastyrylǵan. Bul qadamdar jáne olardy iske asyrý EAEO aiasynda Qyrǵyzstan arasynda qabyldanǵan barlyq ýaǵdalastyqtardy qamtamasyz etýge múmkindik beredi», - dedi ol.
Depýtat óz sózinde Qazaqstan men Qyrǵyzstan óte jaqyn elder ekenin, memleketterdiń kóptegen birlesken ekonomikalyq múddeleri qalyptasqanyn, al halyqtar baýyrlas ekenin eske salyp ótti.
«Osy oraida bizdiń qarym-qatynastardy tereńdetý, yntymaqtastyqty nyǵaitý Qazaqstanǵa da, Qyrǵyzstanǵa da tiimdi»,- dedi M. Áshimbaev.
Esterińizge sala keteiik, jaqynda QR Premer-Ministriniń birinshi orynbasary Asqar Mamin men Qyrǵyzstan Premer-Ministriniń orynbasary Tolkýnbek Abdygýlov ekijaqty ekonomikalyq yntymaqtastyq týraly Jol kartasyna qol qoidy.
Jol kartasy shekara, kólik, fitosanitariialyq jáne veterinarlyq baqylaý, kedendik jáne salyqtyq ákimshilendirý salalary boiynsha ózara qarym-qatynas, sondai-aq ekijaqty yntymaqtastyqtyń mańyzdy máselelerin sheshýge negizdelgen 50 sharany qamtidy. Qujatta tez arada qolǵa alynýy tiis 16 shara, qysqa ýaqytta jasaýy tiis 5 jáne júieli túrde jasalatyn 29 shara eskerilgen.
Jol kartasyna qol qoiǵan soń Qazaqstan men Qyrǵyzstan EAEO syrtqy shekarasynda kedendik, salyqtyq, veterinarlyq, fitosanitariialyq jáne sanitarlyq-epidemiologiialyq baqylaý júrgizýdi qamtamasyz etýdiń jańa tásilderine, sondai-aq Qazaqstan-Qyrǵyz shekarasy arqyly eksporttyq-importtyq jáne tranzittik taýarlardy Eýraziiayq ekonomikalyq komissiia ókideriniń qatysýymen ótkizýge qol jetkizedi.
Qyrǵyz tarapy joǵaryda kórsetilgen salalar boiynsha EAEO talaptaryna tolyqtai sai keletin dárejede baqylaý jasaýdy moinyna aldy.
