Memleket basshysynyń Jarlyǵyna sáikes qazir elimizdiń barlyq óńirinde aýmaqtyq áskerler jasaqtalyp jatyr. Bul týraly QR Prezidenti Ákimshiligi Basshysynyń birinshi orynbasary Máýlen Áshimbaev Facebook-tegi paraqshasynda jazdy, dep habarlaidy "Ult aqparat".
«Memleket basshysynyń Jarlyǵyna sáikes qazir elimizdiń barlyq óńirinde aýmaqtyq áskerler jasaqtalyp jatyr. Sarbazdardyń aldy mindetterine kirisip te ketti. Olar koronavirýs indetimen kúres jumystaryna jumyldyrylýda.
Osy rette qiyn-qystaý shaqta sapqa turǵandardyń basym bóligi óz erikterimen suranyp kelgen azamattar ekenin erekshe atap ótkim keledi. Tipti keibir óńirlerde shaqyrylǵandardyń sany boljanǵan shekten asyp ketken. Elge qyzmet etýge niet bildirgen jastar jergilikti jerlerdegi áskeri komissariattarǵa áli de kelip jatyr. Kúrdeli kezeńde kópke úlgi kórsetken erikti sarbazdardyń ishinde belgili sportshylar men óner juldyzdary da az emes. Solardyń qatarynda kók týymyzdy ring pen sahnada birdei jelbiretip júrgen Ibragim Eskendir baýyrymyz bar. Qol kúresinen halyqaralyq saiystarda el namysyn abyroimen qorǵai bilgen Timýr Sypataev ta el úshin eńbek etýge daiar ekenin bildirdi», - deidi Máýlen Áshimbaev.
Sondai-aq, ol zapastaǵy ofitserler de qandai jumys bolsa da daiyn ekenin aityp, qatarǵa qosylyp jatqanyn aitty.
«Elordada aǵaiyndy tórt birdei jigittiń óz erikterimen arnaýly jiynǵa kelip, áskerge alynǵanyn osy áleýmettik jeli arqyly bilip jatyrmyz. Munyń bári naǵyz eldik pen birliktiń jarqyn kórinisi ekeni sózsiz.
Shyn máninde, biz el basyna kún týǵanda atqa qonǵan qaisar halyqtyń urpaǵymyz. Jastarymyz qazirgidei syn saǵatta judyryqtai jumylý arqyly sony aiqyn dáleldep berdi. Ár azamatymyz osylai jaýapkershilikti sezinip, Otan úshin uiysa bilse kez kelgen synaqtan súrinbei ótemiz.
Yrys-yntymaqtyń arqasynda buǵan deiin de talai dúrbeleńnen aman qaldyq. Oǵan tarih kýá. Bul joly da dál solai bereke-birlik tanytyp, indetti birge eńseretinimizge senemiz», - dep tolyqtyrdy QR Prezidenti Ákimshiligi Basshysynyń birinshi orynbasary.
