Ekibastuzda birneshe balanyń ash-jalańash qalǵany belgili bolǵannan keiin meditsina qyzmetkerleri sógis aldy.
Jergilikti Pavlodarnews.kz habarlaýynsha, qyzmettik tergeýdi Pavlodar oblysynyń ákimdigi men densaýlyq saqtaý basqarmasy júrgizedi, dep jazady Sputnik Qazaqstan.
"Aqsý aýrýhanasynda bosandyrýǵa jaýapty mamandar jazalandy. Aqsý qalalyq aýrýhanasynyń bas dárigeri sógis aldy, Ekibastuzdyń birneshe meditsina qyzmetkerine eskertý jasalyp, sógis berildi", - dep málimdedi densaýlyq basqarmasynyń basshysy Aidar Seitqazinov.
Onyń aitýynsha, júdeý tabylǵan balalardyń jaǵdaiyn baqylaýǵa alýǵa jaýapty bolǵan mamandar jazalandy.
Al balalar qazir oblystyq balalar aýrýhanasynyń infektsiialyq aýrýlar bóliminde jatyr.
"Olardyń genetikalyq aýrýy bolýy múmkin. Ata-anasynyń aitýynsha, olar buryn júrgen, biraq keiin birtindep júrmeitin bolǵan", - dedi oblystyń bas dárigeri.
Diagnozdy anyqtaý úshin balalarǵa birneshe tekserý júrgiziledi. Onyń ishinde KT, ÝDZ, gormondar tekserý bar. Pavlodarlyq dárigerler Nur-Sultandaǵy ana men bala ulttyq ǵylymi ortalyǵynyń mamandarymen birlesip balalarǵa diagnoz qoiyp, emdeý jolyn anyqtaidy.
Eske sala ketsek, Ekibastuzda volonterler, politsiia qyzmetkerleri men qamqorshylyq organdary ash qalǵan tórt balany anyqtady. Berekesiz otbasy týraly politsiiaǵa kórshileri habarlaǵan.
Mekenjaiǵa kelgen tiisti organ ókilderi 7, 5, 4 jáne 3 jasar naýqas balalardy kóredi. Olardyń biriniń ishi úlkeiip ketse, biri eki kúnnen beri qusyp jatqany belgili boldy. Úide tamaq bolmaýyna bailanysty balalar úsh kúnnen beri nár tatpaǵan. Tipti balalardyń bári kiimsiz bolǵan.
Balalardyń anasy 1994 jyly týǵan, al ákesi "Bogatyr Kómir" JShS kómir óndirýshi kásiporynnyń merdiger mekemeleriniń birinde jumys isteidi. Otbasy únemi kóship-qonyp júrgen.
Osy oqiǵadan keiin Ekibastuz jáne Aqsý qalalarynyń ákimderi sógis aldy.
