Foto: agroinfo.kz
Májilis depýtaty Murat Ergeshbaev Qazaq kúrish sharýashylyǵy ǵylymi-zertteý institýtynyń máselesin kóterip, Premer-Ministrdiń orynbasary – ulttyq ekonomika ministri Serik Jumanǵarinǵa depýtattyq saýal joldady, dep habarlaidy Ult.kz.
Depýtattyń sózinshe Qyzylorda oblysynda eksporttyq áleýeti zor sala ol – kúrish salasy. Kúrish jarmasyn tutyný ózge jarma túrlerin tutynýmen salystyrǵanda 65%-dan asyp, kúrish elimizdiń azyq-túlik qaýipsizdigin qamtamasyz etip otyr. Statistikaǵa sáikes óńirimizde kúrish ónimdiligi jyl sanap joǵarylap keledi, eger 1991-1995 jyldary Qyzylorda oblysy boiynsha kúrishtiń ortasha ónimdiligi gektaryna 37,1 tsentner bolsa, 2021-2023 jyldary gektaryna 60 tsentnerdi qurady.
Kúrishtiń ónimdiligin odan ári artýy úshin joǵary ónimdi sapaly tuqym, mineraldy tyńaitqyshtar, arnaiy tehnika jáne preparattar qajet ekenin aitqan depýtat Ergeshbaev:
"Bulardyń bárin osy kezde elimizge saraptamadan ótkizbei, sharýashylyqtar qoldanyp jatyr. Eskirgen tehnikany qoldaný, qosalqy jabdyqtar men servistik qyzmettiń shyǵynynyń joǵarlaýy, saraptamadan ótpegen tuqym men tyńaitqyshtardy qoldaný kúrishtiń ónimdiligin tómendetýde", -dep otyr.
Murat Ergeshbaevtyń aitýynsha syr óńirindegi úlken ǵylymi orda jáne elimizdegi kúrish salasyn zertteitin jalǵyz mekeme – Ybyrai Jaqaev atyndaǵy Qazaq kúrish sharýashylyǵy ǵylymi-zertteý institýty. Institýt búginde materialdyq-tehnikalyq bazasyn qamtamasyz etý túgil, eńbekaqyny ýaqytyly tólei almaýda.
"Ǵalymdardyń jalaqysynyń tómendigi, labarotoriialardyń materialdyq-tehnikalyq bazasynyń eskirýi, ashylyp jatqan selektsiialardy tiisti dárejede qarjylandyrmaý saldarynan institýttyń múmkindigin tolyq paidalana almai otyrmyz. Soǵan qaramastan institýt ǵalymdary kúrishtiń jańa sorttarynan bólek, malǵa azyq bolar ózge de daqyldardyń jańa suryptaryn shyǵaryp, sý, resýrs únemdegish tehnologiialardy zerttep, óndiriske usynýda", -deidi depýtat.
2022 jyly el Prezidenti: «QR Agroónerkásiptik keshenin damytýdyń 2021-2030 jyldarǵa arnalǵan tujyrymdamasyn iske asyrý jónindegi is-qimyl josparyna sáikes kúrishtiń ónimdiligin arttyrý úshin Y.Jaqaev institýtynyń jarǵylyq kapitalyn ulǵaityp, materialdyq-tehnikalyq jaraqtaryn jetildirý qajet», - dep tapsyrǵan. Alaida, májilismen tapsyrma áli ornydalǵan joq ekenin aitady.
Qazaq kúrish sharýashylyǵy ǵylymi-zertteý institýty zertteýleri boiynsha Qyzylorda oblysyndaǵy kúrish egisin, tipti, sý tapshylyǵy jaǵdaiynda da melioratsiialaýshy daqyl retinde keminde 80 myń gektar deńgeiinde ustap turý mańyzdy. Kúrish egisterin odan ári qysqartý jerlerdiń tuzdanýyna ákelýi múmkin.
Murat Ergeshbaev Serik Jumanǵarinǵa joǵaryda atalǵan máselelerdiń áleýmettik-ekonomikalyq mańyzdylyǵyn eskere otyryp, 2025-2035 jj. aralyǵynda qazaq kúrish sharýashylyǵy ǵylymi-zertteý institýtyn ǵylymi kadrlarmen qamtamasyz etýge; materialdyq-tehnikalyq áleýetin damytýǵa; selektsiialyq jáne tuqym sharýashylyǵyn jáne laboratoriialyq bazasyn jańǵyrtýǵa usynylyp, oń ekonomikalyq qortyndy alǵan quny 4 148 million teńge quraityn memlekettik investitsiialyq jobany qarjylandyrýdy osy jyldan bastap qoldaýdy surady.
