Astana qalasyndaǵy №2 Esil aýdandyq sotynda Seiitqazy jáne Áset Mataevtardyń isi boiynsha sot otyrysy odan ári jalǵasýda. Búgingi otyrysta sotqa túsinik bergen Seiitqazy Mataev salyq tóleýde qatelikter jibergenin, sonyń nátijesinde milliondaǵan somany tóleýden jaltarǵanyn moiyndady.
«Barlyq esep-qisap jumystarymen meniń marqum dosym – Aleksandr Qimasov ainalysty. Ol ótken jyly 21 qyrkúiekte Máskeýde aýyr naýqastan qaitys boldy. Shynymdy aitsam, ózim áli kúnge deiin kompiýtermen jumys isteýdi bilmeimin. Men salyq tóleitin kezde 130.00 formasyn, 100.00, 101.04 formalaryn tapsyrý kerektiginen habarsyz boldym. Sondyqtan salyq tóleýde qatelikter jibergenimdi moiyndaimyn. Bul jerde jasyratyn eshteńe de joq»,- dep túsindirdi S. Mataev. Onyń aitýynsha, «Ulttyq baspasóz klýby» qoǵamdyq birlestiginiń vitse-prezidenti qyzmetin atqarǵan A. Qimasov esep-qisappen qosa, tenderlik qujattardy daiyndaýmen ainalysqan. Sóite tura «Ulttyq baspasóz klýby» qoǵamdyq birlestiginiń shtatynda jalǵyz ǵana Seiitqazy Mataev tirkelipti. «Ulttyq baspasóz klýby» qoǵamdyq birlestiginiń shtatynda jalǵyz ózim ǵana boldym. Al «QazTAG» halyqaralyq aqparat agenttigi» JShS-niń shtatynda 50-ge jýyq qyzmetkerler jumys istedi. Solardyń jalaqysyn agenttik ózi taýyp berdi, memleketten aqsha alǵan joq»,- dedi S. Mataev sottaǵy sózinde.
Almaty qalalyq memlekettik kirister departamentiniń salyq tólemderi boiynsha tekserýinen anyqtalǵandai, Seiitqazy Mataev zańdy tulǵa retinde biýdjetke 168 730 897 myń teńge korporativtik tabys salyǵyn tóleýden jaltarǵan. Sonymen qatar, jeke tabys salyǵy boiynsha 2011-2015 jyldary 65 420 741 teńge, rezident bolyp tabylmaityn tulǵalar úshin 2011- 2014 jyldary 8 578 748 teńge tólenbegen. Atap aitarlyǵy, «Ulttyq baspasóz klýby» qoǵamdyq birlestiginiń ishki úderisinde iri kólemdegi aqsha ainalymyna bailanysty S. Mataev 100.00 (onda zańdy tulǵalardyń korporativtik tabys salyǵy boiynsha tabysy kórsetiledi), 101.04 (bul rezident bolyp tabylmaityn zańdy tulǵalar úshin tapsyrylady) jáne 200.00 (onda azamattyq tulǵalardyń tabysyn kórsetedi) nómirli salyq tóleý formalaryn tapsyrýǵa mindetti bolǵan. Alaida ol tabysyn jasyryp, tek 130.00 salyq tóleý formasyn tapsyryp kelgen. Onda kommertsiialyq emes uiymnyń tabysy kórsetiletindikten salyq tólenbeidi.
Sotqa deiingi tergeý is-sharalarynan anyqtalǵandai, «2010-2015 jyldar aralyǵynda Seiitqazy Mataev óz uly – «QazTAG HAA» JShS-iniń bas direktory Áset Mataevpen birlesip, aldyn-ala bir top adamdarmen sóz bailasyp, aldaý men senimdi teris maqsatqa paidalaný jolymen memlekettik satyp alý salasyndaǵy 169 mln. teńge biýdjet qarajatyn jymqyrdy» dep aiyptalýda. Biraq ol mundai aiyptaýlarmen kelisken joq. «Men eshqandai aqsha urlaǵan joqpyn. Eger kóp aqsha urlasam, oǵan páterler men avtokólikter satyp almaimyn ba? «Ulttyq baspasóz klýby» qoǵamdyq birlestiginiń qaramaǵynda birde-bir kólik joq. Biz jumys isteitin jerge jaqyn turatyndyqtan avtobýspen nemese jaiaý qatynadyq. Tipti bankke de jaiaý baratynbyz»,- dep túsindirdi S. Mataev. Sottaǵy sózinde ol óziniń de, týystarynyń da qarajaty joqtyǵyn aitty. «Bárin tekserdi. Tipti meniń endi tái-táilap júrgen nemerelerimdi de tekserdi. Sol tekserilgen 64 adamnyń ishindegi úsheýi ǵana týystarym: kelinim, ózim jáne ulym»,- dedi «Ulttyq baspasóz klýby» QB-niń prezidenti.
Ámirlan Álimjan
