Astana qalasyndaǵy №2 Esil aýdandyq sotynda Seiitqazy jáne Áset Mataevtardyń isi boiynsha sot otyrysy jalǵasyp jatyr. Búgingi sot otyrysynda túsinik bergen Seiitqazy Mataev óz atyna túsirilgen azamattyq shaǵymdarmen kelispeitinin habarlady. «Men «Qazaqtelekom» AQ-nyń jáne Bailanys, aqparattandyrý jáne aqparat komiteti túsirgen azamattyq shaǵymdarmen kelispeimin. Sebebi biz óz moinymyzǵa alǵan barlyq mindettemelerdi oryndadyq»,- dedi ol sot sýdiasyna bergen jaýabynda.
Aita ketelik, buǵan deiingi sot otyrysynda zardap shekken tarap «QazTAG» halyqaralyq aqparat agenttigi» JShS-inen 2010-2015 jyldary Bailanys, aqparattandyrý jáne aqparat komitetimen jasalǵan sharttardyń talaptary boiynsha agenttikke tólengen qarajatty tolyqtai óndirip berýdi ótingen bolatyn. Azamattyq shaǵymda «QazTAG» halyqaralyq aqparat agenttiginiń kórsetken qyzmeti tehnikalyq sipattamaǵa sáikes kelmegeni týraly aityldy. Ony sotqa Aqparat jáne kommýnikatsiialar ministrliginiń saraptamalyq departamenti direktorynyń orynbasary Raýan Ahmetov oqyp berdi.
«Azamattyq shaǵymdy túsirý barysynda biz Qarjylyq baqylaý komiteti ókilderiniń, filologtardyń jáne IT-tehnologiialary mamandarynyń tujyrymyn basshylyqqa aldyq. Sharttyń talaptary boiynsha «QazTAG» halyqaralyq aqparattyq agenttigi» JShS-gi tehnikalyq sipattamada kórsetilgendei kólemde sharttyń talaptaryna sáikes keletindei qyzmetti iske asyrý kerek bolatyn. Alaida tekserý barysynda ol qyzmettiń shart talaptaryna sáikes emestigi anyqtaldy. Qyzmet túri sharttyń talaptaryna sáikes kórsetilmegendikten, árbir shart boiynsha biýdjetten aýdarylǵan qarajat respýblikalyq biýdjettiń kirisine tolyq kólemde óndirilip alynady»,- dep túsindirdi Raýan Ahmetov.
Óziniń sotqa bergen jaýabynda Seiitqazy Mataev Bailanys, aqparattandyrý jáne aqparat komitetiniń eshqandai laýazymdy tulǵalarymen kezdespegenin aitty. «Aiyptaý aktisinde aitylǵandai, sol kezdegi komitet tóraǵasy Bolat Bersebaevpen aramyzda eshqandai da kelisim bolǵan joq»,- dedi S. Mataev. Alaida buǵan deiingi sot otyrysynda Bailanys, aqparattandyrý jáne aqparat komitetiniń burynǵy tóraǵasy Bolat Bersebaev Seiitqazy Mataevtyń ózine paidakúnemdik qyzyǵýshylyqpen ótinish jasap, «QazTAG» halyqaralyq aqparat agenttigimen eki lot boiynsha «bir kózden» qarajat bólýge shart jasaýdy usynǵanyn aitty. «Men Seiitqazy Mataevpen «Ulttyq baspasóz klýbynyń» Almatydaǵy ǵimaratynda kezdestim. Mataev shart jasaýdy surady. Meniń onymen janjaldasýǵa eshqandai nietim bolǵan joq. Oǵan qosa «QazTAG» siiaqty bedeldi agenttiktiń memlekettik aqparattyq saiasatty tiimdi jáne sapaly nasihattaitynyna úmit arttym»,- dedi kýáger.
Tergeýdiń nusqasy boiynsha, 2010-2015 jyldar aralyǵynda Seiitqazy Mataev óz uly – «QazTAG HAA» JShS-iniń bas direktory Áset Mataevpen birlesip aldyn-ala bir top adamdarmen sóz bailasyp, aldaý men senimdi teris maqsatqa paidalaný jolymen memlekettik satyp alý salasyndaǵy iri kólemdegi biýdjet qarajatyn jymqyrǵan. Urlanǵan aqshanyń kólemi 169 mln. teńgeni quraidy. Aitpaqshy, sottyń búgingi otyrysynda Seiitqazy Mataev: «Ulttyq baspasóz klýby» qoǵamdyq birlestiginiń shtatynda jalǵyz ózim ǵana boldym» dep málimdedi. Sondai-aq, ol qoǵamdyq birlestikke eshqandai múshelikke ótpegen azamattyq tulǵalarǵa 254 mln. 721 teńge aýdarǵanyn da rastady.
Ámirlan Álimjan
