Astana qalasynyń №2 Esil aýdandyq sotynda «Mataevtar isi» boiynsha sot otyrysy jalǵasyp jatyr. Sot qylmystyq is boiynsha kýágerlerden jaýap alýda. Búgingi otyrysta «Qazaqtelekom» AQ-na qatysty epizod boiynsha elimizdegi baspa BAQ-tardyń ókilderi sotqa túsinik berdi.
«Ulttyq baspasóz klýby» qoǵamdyq birlestiginiń «Qazaqtelekom» AQ-nyń qyzmeti týraly jarnamalyq materialdardy «Ekspert-Qazaqstan» jýrnalyna shyǵarýǵa eshqandai qatysy bolǵan joq. Biz barlyq jumystardy «Qazaqtelekom» AQ-men ózimiz júrgizdik»,- dep habarlady búgingi sot otyrysynda kýágerlerdiń biri, «Ekspert-Qazaqstan» JShS-niń jarnama bóliminiń menedjeri Svetlana Semenova. «Men menedjer retinde tikelei «Qazaqtelekom» AQ-men jumys júrgizdim. Al Ulttyq baspasóz klýbynyń bul jumysqa eshqandai qatysy bolǵan joq. Tek aitarym, men daiyn materialdardy, esep-qisaptardy, atqarylǵan jumystardyń aktilerin Ulttyq baspasóz klýbyna jiberip otyrdym»,- dep áńgimeledi S. Semenova.
Osy kýágerdiń aitýyna qaraǵanda, «Qazaqtelekomnyń» qyzmeti týraly materialdar «Ekspert-Qazaqstan» jýrnalyna jariialanǵannan keiin qujattar tizimin ol esepshiler bólimine tapsyrǵan. Ol qujattardyń ishinde jýrnaldyń shyǵatyn kúni, aiy, jyly týraly derek, jarnama berýshiler, jarnamanyń kólemi jáne baǵasy jónindegi málimetter bolǵan. Esep qujattarynda kórsetilgendei, negizgi jetkizýshi – «Ulttyq baspasóz klýby» qoǵamdyq birlestigi týraly málimetterdi «Qazaqtelekom» AQ-nyń buqaramen bailanys basqarmasynyń qyzmetkerlerinen alǵan. Saiyp kelgende, kýáger Svetlana Semenova «Ulttyq baspasóz klýbynyń» tender ótkizilmei turyp, qyzmetterdi jetkizýshi bolyp aldyn-ala belgilenip qoiǵanyn aitty.
Aita ketelik, buǵan deiingi sot otyrystarynyń birinde túsinik bergen «Qazaqtelekom» AQ-nyń strategiialyq basqarý jónindegi bas direktory Batyr Mahanbetajiev memlekettik satyp alý erejeleri boiynsha qosalqy merdigerlikke berýdi yqshamdaý qajettigin aldyn ala bilse de, Seiitqazy Mataevtyń usynysymen keliskenin habarlady. Sóitip ol óz qyzmetkerlerine tenderlik qujattardy belgilengen tártipke sáikes daiyndaýǵa S. Mataevqa qol ushyn sozýǵa tapsyrma beredi.
Ekinshi kýáger - «Tolǵaý» JShS-niń bas direktory Aleksandr An «Qazaqtelekomnyń» qyzmeti týraly jarnamalyq materialdar týraly esep-qisap qujattary tender ótkizilmei-aq «Ulttyq baspasóz klýby» qoǵamdyq birlestigine jiberilip otyrǵanyn ashyq aitty. «Qazaqtelekom» AQ-nyń qyzmeti týraly materialdardy basylymdarǵa shyǵarýmen «Tolǵaý» JShS-niń qyzmetkerleri ainalysty. Meniń biletinim, tender ótkizilmei turyp, iaǵni «Qazaqtelekom» AQ-y men «Ulttyq baspasóz klýby» QB-niń arasynda shart jasalǵanǵa deiin, esep-qisap qujattary «Ulttyq baspasóz klýbyna» jiberiletin»,- dep túsindirdi istiń mánisin A. An.
Buǵan qosa, tergeý barysynda anyqtalǵandai, «Ulttyq baspasóz klýby» qoǵamdyq birlestiginiń prezidenti Seiitqazy Mataev basylymdarǵa jarnamalyq materialdar shyǵarý boiynsha kórsetiletin qyzmetterdiń qunyn kóterip jibirgen. Sóitip kóterilgen baǵanyń aiyrmasynan túsken qarajatty qolma-qol aqshaǵa ainaldyryp, óziniń jeke qajettilikterine jaratqan.
Tergeýdiń nusqasy boiynsha, «Ulttyq baspasóz klýby» qoǵamdyq birlestiginiń prezidenti Seiitqazy Mataev 2011-2013 jyldar aralyǵynda qyzmet túrleriniń qunyn kóterý jolymen «Qazaqtelekom» AQ-na jarnamalyq-aqparattyq materialdardy ornalastyrýǵa bólingen 398 mln. teńgeniń 143 mln-yn urlaǵan.
Ámirlan Álimjan
